e non ge ne romaze niguna. E li incantoi fem quelli mesmi segnë davanti a lo re faraom, si che lo cör de faraom si fo indurao e non vosse atende quello ch'e' l'avea prom[i]sso a Moizes e non vosse lasá andá a sacriffichá in lo dezerto.


Chì se contèm como la quarta fiá lo nostro Segnor Dee mandà Moizes a lo re faraom e fe lo segná de le mamalove.

Disse lo nostro Segnor Dee a Moizes: "Indurao è lo cör de re faraom, unde vatene a ello e dige che ello lasse andá lo mé pövo se non che e' ge manderò tante mamalove e grilli che destrueram tute le erbe e le fögie e tuti li erbori de la terra de Egito, e se o non vorà cré, dirai a Aron che ello fere de la verga in la fassa de la terra, e si ne insirà mamalove e grilli, cossì in li homi como in le femene e in le bestie".

Moizes ze a faraon e si ge disse: "Lo nostro Segnor Dee si te manda a dí che tu lasi andá lo so pövo se non che o te manderà tante mamalove [e] grilli che destrueram tuta la terra e le erbe de Egito".

E faraon non ge vosse cré. E quando ello se partì da lo re faraom, Aron si levà la man e ferì con la verga in terra e insìne tante mamalove e grilli che inpìn tuta la terra de Egito. E lo cör de Faraom era si undurao che o non lo vosse cré.


Chì se contèm como la quinta fiá che lo nostro Segnor Dee mandà Moizes a parlá a lo re faraom e' fe lo segná de le mosche con li sagogij.

Disse lo nostro Segnor Dee a Moizes: "Vatane[sic] a lo re faraom e dige da mea parte che o lasse andá lo mé pövo a sacriffichá in lo dezerto, e se o non lo vorà fá e' ge manderò tante mosche con forti sagoij, che elle destrueram fortementi tuta la terra de Egito, salvando senper la terra unde stan li figij d'Issael. E' si farò grande diferencia da la terra unde stam li figij d'Issael da quella unde stam li figij de Egito per dá a intende che e' sum lo Dee poderozo sorve tute cosse".

E quando Moizes ave inteizo lo comandamento de Dee, si se ne ze con so frai Aron a lo re faraom e si ge disse so che lo nostro Segnor Dee ge avea dicto, de che faraom non l'aprexava niente. E quando Moizes se partì da faraom, si levà le maim inver lo cel e incomensà a vegní le mosche, le quë eram de diverse mainere, e fone si pina tuta la terra de Egito che la gente non lo poivam soferí. E li incantoi vossem fá cossì e non poem. E lantora li incantoi dissem che questa era övera de Dee. Unde faraom temè e mandà per Moizes e per Aron e si disse: "Andai a sacriffichá a lo vostro Dee".

Respoze Moizes: "Questo non se po fá davanti la crudelitai de li Egiciem, fossa[sic] che e' non voremo fá quello che fam li Egiciem, asochè j non ne alapiassem, per che o non se po fá in nisum modo, ma e' anderemo tuti de föra in lo dezerto e lì sacrifficheremo a lo nostro Dee, e si meneremo con noi le nostre mogié, le nostre conpagne, le nostre arme, le nostre bestie, cossì como per comandamento e' amo da lo nostro Segnor Dee".

Disse lo re faraom a Moizes: "Prega lo to segnor Dee che ello me leve queste mosche e questa pestelencia chi e sorve mi e sorve lo mé pövo, e si laserò andá lo so pövo".

Respoze Moizes: "E' lo farò vorentera".

Alaora o se partì da faraom e levà le maim a cel e recheze marcè a lo nostro Segnor Dee, e che ello levasse quelle mosche, e incontenente e' se ne zem, che non se ne trovà niguna, salvo como era avanti.

Or quando faraom vi che le mosche se ne eram andaite, ello non vosse lassá andá lo pövo, tanto era indurao lo so cör in má far.


Chì se contèm como la sesta fiá lo nostro Segnor Dee mandà Moizes a lo re faraom e' fo lo segná de la grande mortalitae.