 |
Questa pagina a no l'è stæta corretta. | |
19.
O voiätri che dêuviæ
Ciave fäse e grimadelli,
E e bûtteghe svalixæ
Con päfæri e con scöpelli,
Se a Giûstizia a no v'abbranca
No credei de fäla franca!
20.
Viva, viva l'invenzion
De quest'ûtile istrûmento
Chi mettiâ da soggezion,
Do rimorso e do spavento
Chi pûrghiâ l'ûmanitæ
Da-i bonæge i ciù ostinæ!
Sento ûnn-a mosca chi me sghêua d'intorno,
Un chi vende ciæbælle pe lanterne,
Un chi conta de vescie tûtto o giorno,
Un chi m'annoia co-e lamente eterne:
Un chi spära di gosci e di erexïe
E ch'o se credde d'ëse chi sà chïe!
2.
Sento e conversazioin noiöse, inscipide
De case de civile condizion
Donde mensûnnan l'Eschilo, l'Euripide
E l'Omero, e o Virgilio, e o Ciceron,
Donde tra o gran sûssiego se finisce
Con parlâ de bacilli e stocchefisce.
