 |
Questa pagina a no l'è stæta corretta. | |
Sûnetto
Con dêuviâ di potenti cannociâli
Veddo spuntâme ûn mondo d'ommettin
Da mæxima grandessa, tûtti eguâli,
De talento e de chêu tûtti piccin.
E veddo re, ministri e generali,
Marcheixi, conti e ricchi çittadin,
Dotti, artisti, scienziæ, mëghi e legali,
Che ciù tanto l'ammïo me pan moscim.
E veddo promûlgâ lezzi piccinn-e
E remenâ de sciabbre pe i rissêu,
E stampâ libbri pin d'idee meschinn-e.
Che me vorte e me gïe donde se vêu,
Veddo teatrin, gëxette, casettinn-e,
Immagini e bûgatte da figgêu.
V.
