 |
Questa pagina a no l'è stæta corretta. | |
A stradda Circonvallazion a monte.
Sûnetto
A stradda Circonvallazion a monte
Bella de sò magnifiche vedûte,
Centro de l’äia bonn-a e da salûte,
L’han ridûta ûnn-a barca de Caronte.
Confûzo e rosso de verghêugna in fronte,
Veddo ûn mûggio de case tiæ sciû sciûte,
Aspresciæ, äte, basse, ma costrûte,
Feûa de lûxe, de squaddra e d’orizzonte.
Terrasse con l’angiôu, teiti in scûggiæla,
E fûmmaiêu binelli e lûxernæ
Che pä che fassan tra de lö tombæla;
Fan concorrenza a Chêullôa e Gattamöa,
Levan a mëgio vista da çittæ
E fan che di foestê seggemmo a föa.
