 |
Questa pagina a no l'è stæta corretta. | |
Ghe n’é troppo tanti fræ!
Un socialista, ûn de quelle gente
Che speran in sciö serio de spartî,
Affermando pe-a stradda ûn poscidente
Coscì a quattr’êuggi o se ghe mette a dî:
Mi so che voî sei ricco comme o mâ,
So che sei a colonna do partîo,
So che no v’affermæ de predicâ
Che semmo tutti fræ davanti a Dio.
Mi, comme me veddei, son tûtto strasse,
No so ciû comme fä, divento scemmo,
Da-o zazzûnâ me molla e gambe ë brasse,
Dunque, comme dixeivi, dividemmo?
O poscidente o frûga, o tôsce, o spûa,
Poi o ghe mette ûnn-a palanca in man,
E veddendo che l’atro o fremme, o lûa,
Comme s’o foise roziggiôu da ûn can,
O ghe dixe con tûtta serietæ:
Ammiu de no parlane!.... de stä sïtto!....
Perchè s’eì da spartî con tûtti i fræ
No ve tocca o milleximo d’ûn citto.
