 |
Questa pagina a no l'è stæta corretta. | |
Timô giûstificôu
Un mëgo ne-o passä da-o camposanto
O s’ascondeiva a faccia cö mandillo,
Vortandose inderrê d’intanto intanto
Da-o gran resäto, se schittava ûn grillo.
E stæto interrogoû de quella scena,
O g’ha risposto: Me daiei raxon
Quande saviei che chi gh’é mezo Zena
Assotterrâ pe sola mæ caxon.
Coscì m’ascondo a faccia, e tremmo, e sûo
Se sotto i pê me scroscie ûn sascettin;
E temmo che, se son riconosciûo,
Me vegnan a piggiame pe-o solin!
Chi se contenta göde
Se prometteiva - da-i commedianti
De dä commedie - ciû castighæ,
Ma intanto e reçite - se tiava avanti
Con danno e scandalo - de l’onestæ.
No gh’éa ciû limiti - mascima e feste
Con quello teatro - cosci stivôu;
E quande ûn giorno - de gente oneste
In confidensa - ghe n’han parlôu,
O cappocomico - o se scûzava
Con dighe: A colpa - no l’ho poi mi,
Ma quello stupido - ma quella crava
De colto pûbblico - chi vêu coscì.
Con questa röba - chi crïa vendetta
Femmo de piene - da sbalordî,
Mentre con l’ätra - mai de cascetta,
Con fä di miäcoi, - no poëmo impî.
