 |
Questa pagina a no l'è stæta corretta. | |
Dà de l’ommo spiritozo
All’osceno, a-o scandalozo,
E decanta o parlâ mâ
Pe modello da imita.
Fa delungo bonn-a ciæa[sic]
A chi sa vortâ bandea;
Fa dûxento e mille inchin
A-o paggiasso, all’arlichin.
Ciamma, ciamma o camorrista,
L’intrigante, l’affarista,
O mercante d’opinion
Pe colonne da nazion.
Ciamma e Frini e Messalinn-e
Eleganti scignorinn-e;
Ciamma e donne emancipæ
Donne onæste, bonn-e moæ.
Ti veddiæ che prëxo e stimma
T’acquistiâ qualunque rimma,
Comme tûtti se daian
Pe accattate da Pagan!
Te mettian co-i libbri dotti
Di ciû splendidi salotti,
E co-a fascia tûtta indoâ
Ti sentiæ ciammate: boâ!
Se t’avesci o santo sdegno
D’avvilite a questo segno,
Manda in mille menissin
O tò vëgio chittarin!
