 |
Questa pagina a no l'è stæta corretta. | |
22.
Un infærno ghe pareiva
De gran fœugo, e ramadan;
Da ro fumme non se veiva
Nè vexin, nè da lontan.
Ma ro bravo Castellin
Sempre adosso a ri Algerin.
23.
Ro mâ, rosso compariva
Da ro sangue zà imbrattaò:
De buscagge o se croviva,
E d'attrezzi imbarassaò.
Ro canon de Castellin
Fracassando ri Algerin.
24.
Doî Sciabecchi ri ciù ardíi
Desmattæ se retiron;
E doî atri freschi, e uníi
A ra Nave s'arembon;
Ma ro bravo Castellin
Ghe fe fâ ra mesma fin.
25
Ra fregatta era de poppa
In battaggia appareggiâ;
Co un canon de mezapoppa
Castellin l'ha fracassâ.
Viva viva Castellin,
Ro terrô dri Algerin.
