 |
Questa pagina a no l'è stæta corretta. | |
L'IGIENE
L'igiene, ai nostri giorni, a l'è riuscïa
a no lasciâ ciù in paxe o fradellin,
e pe combatte a pesta o l'etixïa
a te ghe rompe e scattöe ogni pittin
con riçette, conseggi e avvertimenti
che ghe fan tiâ zù tûtti i... sacramenti.
« Stæ attenti a-a frûta, no bevéì giassôu,
fæ boggî l'ægua, no fæ indigestion,
l'insalatta lavæla con l'axôu,
mangiæ o pan pöso, perchè o l'è ciù bon,
e sorvetûtto; questo o l'è essenziale,
difendeive da-o microbo fatale.
« Difendeive da-e mosche, da-i moscoin,
da-e prûxe, da-i pigœuggi, da-e çinçae,
da-i ratti, tanque, âgni, da-i bagoïn,
da tûtte e bestie, con e sensa äe,
perchè son tutte quante, in mæ veitæ,
da-i microbi e da-a pesta avvelenæ ».
De ciù, pe compî l'opera han scoverto,
che i baxi son di microbi a semensa,
e mì de questo ne son tanto çerto
che vœuggio mette in pratica a sentenza;
e, sciccomme me vœuggio avvelenâ,...
Vegni, Ninetta, vegnime a baxâ!
Quande ho tentôu de fâ l'esperimento
de möî, a causa di microbi do baxo,
no me aspētāvo çerto, in mæ zûamento,
dovesse capitâme ûn bello cäxo
pe-o quæ, sensa contâve de böxïe,
no sò se devo cianze o devo rïe.
Doveì saveì che se ciamma Ninetta
tanto ma sœuxua comme mæ moggê,
e che, no sò se in sbaglio o pe vendetta,
a vëgia a l'è vegnûa a baûsame lê...
Aōa, ho ûnn-a puïa tremenda, me creddeì?
che a m'aggie avvelenôu pe dindavvéì!
