 |
Questa pagina a no l'è stæta corretta. | |
- 36 -
Semmo persci... i tersajêu
I eì fæti... no se pêu,
Cresce o vento: fæ i barî*,
Cacciæ in mâ sciabbre e tûrbanti...
Ah! femmo ægua, emmo da moî,
Femmo ûn voto a tûtti i Santi...
Oh Madonna! aggiæ pietæ
D'esta tûrba de mainæ
Che s'han rotto o fî da schenn-a,
Che no pêuan ciù andâ de boenn-a,
Ni andâ a lasco, ni sperâ
Senza voî, Stella do mâ!...
Grazie a Dio, riveddo Zena,
Ma l'idea de quella scena
A m'ha fæto ûnn'imprescion
Che me paeiva d'ëse ancon
A sentîme rompî a testa
Da-o fracasso da tempesta,
Tanto pêu nell'ommo a puïa!
Mi ch'ëa tösto in angonia,
Cö pansin chi me tremmava,
O me Santo sûpplicava,
Za che tûtto l'ëa spedïo,
De poeì ëse seppellïo
Sotto l'ombra d'ûnn-a croxe
O co-i Anime da Foxe,
Ché scibben son ûn garson
Che n'ho guæi de religion,
Chi sparlasse do mæ Santo
O ciantiæ morto in t'ûn canto.
