 |
Questa pagina a no l'è stæta corretta. | |
Tra lö in eterno se veddian sponciä
Avari e strallatoin, sensa pietâe,
E questi peizi enormi remesciä.
I primmi s'addesciàn co-e moen serrâe,
Ne-o giorno do Giûdizio Universale,
I ätri con i cavelli streppellâe.
O spende e sò sostanze e l'ammûggiäle
G'ha fâeto, perde o ben do Paradiso,
E tormentase a questo punto tale.
Da lö ti pêu piggiäghe ûn serio avviso
Che chi no fa bon ûzo da fortunn-a
Se trêuva ne-i destrasci all'improvviso.
Che tûtto l'ôu che l'è sotto a lunn-a
O che gh'ëa zà, de queste gente chì
O no porriâe riäbilitane ûnn-a.
Mî g'ho dito: Cao Meistro, dimme ascì
Chì a l'è questa fûrtunn-a che ti vanti?
Che disponn-e di beni a peû coscì?
E a mì Virgilio: Povei ignoranti!
Quande a veddei ghe criâe dâeghela a-o-lô,
Incangio de trattala con i guanti.
Dio, che de tûtti i dotti o l'è o dottô,
Ne-a sò sapienza o fabbricava i çê
Con armonia de moto e de splendô.
Onde a fortûnn-a, chi ne ven da lê,
A poeiva comandä che diventasse
Un ricco, e l'ätro sensa scarpe in pê.
Con lê l'è comme manco se parlasse,
Pe l'ê no gh è nisciûn impedimento,
A cangia e strasse in ôu, e l'ôu in strasse.
