 |
Questa pagina a no l'è stæta corretta. | |
SUNETTO DE DEDICA.
Pappæ , Mammæ de Zena, e ciù un caroggio,
E Voi, che a primma cûa êi di Figgiêu,
Ve dedico, gradîlo de bon coêu
Questo mæ Esopo, voeivo dî struffoggio.
Sento zà battaggiâ campan-ne a doggio
Da-i Critici!... che o critiche chi vêu,
Che mi no vendo troffie per raviêu,
Nè spaccio per canella do fenoggio;
Hò misso insemme, senza pretension,
Da bon Poæ de famiggia, e bon Christian,
Çinquanta Foe, v'ë daggo comme son;
Fæle imprende a-i Figgiêu, che diventian
Obbedienti, studiosi, e d’un coêu bon
Senza ciù spaventâli cò barban.
M. P.
