 |
Questa pagina a no l'è stæta corretta. | |
126
E ö scomparisce senz'arvî ciû bocca,
Mentre Enea che â sinistra ö piggia ö gîo
Ö vedde unn-a Cittæ* sotto unna rocca
Ampia, spaziosa, con træ muage in gîo
E un sciûmme neigro che ö-a lambisce e ö-a tocca
Ö Flegetonte che ö va zû d'asbrîo
Trasportando all'inferno e sasci e sciamme
E tûtte e mal'azioin de pelle gramme.
127
In scë primme ö distingue ûn gran porton
Coi pilastri e colonne e coi battenti
D'un diamante ciû dûo che ö sciô Arminjon
Quande ö s'incûccia[1] qualche balla in mente,
Tûtto in færo de li sciorte un torrion
Che ö s'eleva a un'altezza sorprendente
E ghe sta nœutte e di, comme guardiann-a
Provocante, angosciosa a sciâ Pasciann-a.
128
E chi ö sente ûn aloû de sbraggi e centi
Un fracasso de færi e de cadenne
Un mescûggio de voxi e de lamenti,
De giastemme, de lûi de tûtte e menn-e
Sci, che Enea spaventoû: che delinquenti
Son sti chì, sottomissi a queste penn-e?
Cöse son queste voxi e sto fracasso?
Ö ghe domanda, rattegnindo ö passo.
- ↑ incûggia
