 |
Questa pagina a no l'è stæta corretta. | |
Se farà teme ro Senato, e amà,
Ri Senatoi da Principi honorà,
Che cosi è ben de fà.
E ancon re savie grùe imiteràn,
Chi tennen un pè in ere, e un sasso in màn,
E così a l'erta stàn,
Ro pè staghe levaò, no per fuzì,
Ma esse vigilanti, e no dormì,
Ro sasso per ferì,
Come a ro tempo d'Achari s'usava,
Che con ro cazzafrusto se tirava,
E cosi David fava.
Ra formigora exemplo ancon sarà,
Chi ra sò provision per tempo fà,
E se ra mette in cà.
Così questi Segnoi procureràn,
Che a giusto prexo sè vin, òrio, e gràn,
E provision faràn
Inanzi tempo, come fan Lucheisi,
Chi ne recogien poco in lò paeisi,
E n'han per agni, e meisi.
E cosi ancon ri Sguizzari, e Grixoin,
Che no ne nascie dentr'i lò cantoin,
Si ne han re provisioin
