 |
Questa pagina a no l'è stæta corretta. | |
Frec. Cose vorei che ra gente se faççe, ch’aggæ dri dinæ, ò non ne aggæ? Se n’imbrignemmo; tanto per noî a l’è tutt’un-na.
Arp. Orsciù, te gh’ho zà mandao, e te ghe torno à mandâ, vattene. Non me fâ ascadâ ra testa. Ma aspêta un pô. Ti non porteressi miga via quarcosa?
Frec. Ve porto via re vostre tirette.
Arp. Vœuggio veighe, insolente. Mostrame re moen.
Frec. Veivere chì.
Arp. Re atre.
Frec. Re atre?
Arp. Sì.
Frec. Veivere chì (gliele mostra colle braccia dietro).
Arp. T’hæto ascoso ninte int’re braghe? (gli cerca nelle tasche).
Frec. Via, dæme dro naso int’re braghe: amiræghe: ve mostrerò tutto (da se). Vorræ poeighe arróbâ ro figaretto. Vêgio destomagoso.
Arp. Cose ditto d’arróbâ?
Frec. Diggo, che me frughæ da per tutto vei se v’ho arróbao quarcosa (da se). Marganaggia l’avariçia, e ri avari! Vorræ che foîssan despeççæ comme ri tonni in ciappa
Arp. Cose ditto dri avari?
Frec. Che vorreiva veiri appicchæ tutti.
