 |
Questa pagina a no l'è stæta corretta. | |
24
Tenta à sangue ra mariña,
Sciù ro fî dro bollezzumme,
D'Algerin corpi strasciña,
Comme d'érbori ro sciumme;
E in sto mœuo da Castellin
Son desfæti ri Algerin.
25
Doî sciabecchi dri ciù ardíi
Se retiran desmattæ;
E doî âtri freschi e uníi
Ghe succedan avançæ.
Ma ro bravo Castellin
Ghe fa fâ ra mesma fin.
26
Ra fregatta era de poppa
In battaggia appareggiâ,
Da un canon de meza poppa
Castellin l'ha fracassâ.
Viva viva Castellin,
Ro terrô dri Algerin.
27
Uña canonâ de ficco
A cian d'ægua a l'ha buttao
Un sciabecco grosso à picco,
Che per œuggio o l'è passao.
Viva viva Castellin
Ro terrô dri Algerin.
28
Setteçento e ciù son morti,
Ri feríi son quattroçento.
Vaddan questi in ri sò porti
Semenando ro spavento,
Che o parlâ de Castellin
Tremâ faççe ri Algerin.
