 |
Questa pagina a no l'è stæta corretta. | |
Quando in mente me ven, che Maxinetta
A m'ha ligao ro cœu, ma d'uña meña,
Che bezœugna che baxe ra cadeña,
E stagghe scciavo à corpi de bacchetta,
À ti m'appello, Amô, crio vendetta:
Fagghe un giorno provâ ra mesma peña:
Passaghe ro gippon da pêto a scheña,
E lasciaghe int'ra ciaga ra saetta.
Flemma, me dixe Amô. Te pâ che l'agge,
Mi ghe respondo, con quell'assassiña,
Chi ha fæto dro mê cœu sì fiera stragge?
E ch'agge flemma? Quest'è uña meixiña
Da dite à gran merçè: re tò zagagge!
L'è giusto un portâ l'ægua à ra mariña.
