DOMENEGO AURELIO DE FRANÇESCHI
Insigne Predicatô in S. Lorenço.
Tromba dro Çê, fulmine dro peccao,
Terrô dro mondo guasto, e dell'inferno,
Françeschi, ardiscio dî, che in ti descerno
Segnari sciù ri purpiti tornao:
Perchè da ra tò voxe è soffocao
Ro viçio, e re passioin piggian governo,
E ro ben passagê contra l'eterno
Sparisce, e ra Virtù torna in sò grao.
Donque œuvera sarà de quello santo
Zelo, che i cœu ostinæ confonde e atterra,
E dri Predicatoî te dà ro vanto,
Ri trei nemixi, che ne fan ra guerra,
D'aveiri svergognæ, missi intr'un canto,
E fætoghe posâ re arme à terra.