 |
Questa pagina a no l'è stæta corretta. | |
" E ti, ti è un ninte, un attomo
" Da tutti disprexôu,
" Chi trêuva solo allogio
" Ne-a stacca do Spiantôu!
" Và via de chi, descostate,
" Ti no capisci ancon,
" Ritræto da miseja,
" Che ti me fæ ghignon?...
Adaxio, amigo, adaxio,
(Ghe replicò o quattrin)
T’intendo, e sò beniscimo
Che son nasciûo meschin;
Ma pù son necessajo,
Ao mondo comme ti;
Se ti ti hæ tanti meriti,
N’hò qualchedun mi ascì;
Se son bandïo da-e Corti,
Mi no me ne lamento
E do mæ stato miseo
Anzi son ben contento;
Mi levo a famme ao poveo,
No fasso fâ treituìe,
No servo de mercede
A Donne infami, e a Spìe;
Mi e banse da Giustizia
No fasso strapiccâ,
Nè o bello sesso fragile,
Fasso prevaricâ!
