 |
Questa pagina a no l'è stæta corretta. | |
A RI OLIGARCHI
Perchè tanto mâcontenti,
Oligarchi, cosa* avei?
Dîme sciù, se pù vorrei
Che ve posse consolâ.
2
Se ve dâ* quarche fastidio
Che sæ Zena ora* in bardoria
Eh sacæ ch’a l’è uña istoria,
Che pe un peçço ha da durâ.
3
No besœugna dunque dâse
Così presto a ro Diâo;
Son cosette che me crâo[sic!]
Ve doveivi za aspettâ.
4
Voi sei quelli a dira scietta,*
Che per tanti agni passæ
Con vantâne Libertæ,
Ne metteivi a domandâ.
5
De là dazii, chi gabelle,
Là pixoin sempre accresciue,
Chi pagnotte ciù menue;
E voi intanto a carrozzâ.
6
Mascarsoin! a sta manera
Asciugâ ro sangue nostro,
Che l’è pù comme ro vostro!
Ah l’hei çerto da pagâ.
7
Commençè a lasciâ ri titoli
D’Eççellensa, e d’Illusiscimo,
Che sacemmo noi benissimo
Se poei ciù de noi pesâ.
8
Vegnî cari un poco a vedde,
Vegnî tutti a l’Ægua verde;
No gh’è tempo ciù da perde,
E besœugna caminâ.
9
Miræ là çinque farô:*
Bruxan tutti i Libri d’oro;
E gh’è chi ghe dâ* rescioro
Perchè possan ben bruxâ.
10
Oh miræ comme ro vento
Sparze a l’aria quelle carte,
Che ve dâvan tutta l’arte
De poeine mâtrattâ.
11
Tutto è fummo, tutto è çennie
No ne veddo ciù un boccon.
Eh l’è andæta in barlugon
Tanta gloria a noi vantâ.
12
Via corrimmo, aggæ paçiença
De lì presto a ro Paraxo,
Se vorrei de sto desaxo
Soddisfazion piggiâ.
13
Cosa* ghe?* ra gente passa
Senza manco saluave?
Ah l’è quello un peccao grave,
Che besœugna castigà.*
14
Ohime mi! sento che crian
EGUAGLIANÇA, e LIBERTÆ.
Non corr’atro, me lasciæ?
Eh sì, non manchæ d’andâ.
15
Me pareiva un gran miracolo,
Che sentissi mocchi, e zitti
Quanti son vostri delitti,
Per poeivene emendâ.
16
V’aspettavi che ve fesse
Mi dre frasche, o pù d’inchin?
Eh non è mincion Ballin
Comme voi ve poei pensâ.
17
Ama lê ra Libertæ
Non zà scritta* tra i grifoin;
Mi quest’atra che i boccoin
Fâ* dro pan grossi mangiâ.
18
Lê vœu aora comandâse
Comme ciù ghe pâ, ghe piaxe:
Chi ghe brûxa, è ben che taxe
Se vœu in quiete ancon campâ.
19
Sciù coraggio Zenexolli,
Chi è ciù franco, chi è ciù lesto?
Che vorremmo mette a sesto
Sta marmaggia mâ allevâ.
20
Sti tiranni, sti despôti,
Sti birboin, ste teste dure,
Ste marmotte, ste figure
Ne besœugna assoggettâ.
21
Derocchemmo, abbría, d’accordo
Tutte st’arme coronæ,
Misse sorva dri portæ
Da ra tirannia passâ.
22
Questi son de quelli arneixi
Inventæ per ingannane
Da quelle añime profane,
Che han vosciuo tutto abordâ.
23
Sciù, sti pezzi dre arme rotte,
Piggæ sciù, grossi e piccin,
E portæri a pê dro Pin
Dove s’han da sotterrâ.
24
Via, Zeneizi, stemmo forti,
Mantegnimose nei dritti,*
Atrimenti semmo friti
Aora che l’è incomença.*
25
Tutto quello, che pœu dâne.
Solo un’ombra de sospetto,
Senza avei tanto rispetto
Procuremmo de levâ.
26
Toghe rosse, perrucoin,
Busciuoe belle, seminario,
Tutto vagghe a straffalario,
Per no aveighe ciù a pensâ.
27
Così allora sempre liberi
Pœuran ben ri Çittadin
Fâ balletti a pê dro PIN,
E cantâ ro ÇA IRA’.
