 |
Questa pagina a no l'è stæta corretta. | |
75
Chinando dä foresta pe sentê
Scimili a quelli, per i quæ s’intrava,
Dove in sce schêuggi pittoreschi ô pê
Fra costi verdi e spessi ô se pösava,
Uña scena all’Eroe, tutta per lê
Nêuva e stupenda, se ghe presentava:
Sorpreiso a quella vista ô l'è restôu
Fermo ûn momento, estatico e incantôu.
76
Ma fù a so involontaria compiaxensa
Comme un raggio de lûxe consolante
Ch’ô spunta appeña da uña nûvia densa
E ê scomparisce a-i êuggi do viandante:
Anzi çerto che sotto l'apparensa
De scena coscì splendida e brillante
A ræ gh’ëa ascosa dell’iniquitæ
Se raddoppia ä so peña e a so anscietæ.
77
Là in mezo a uña cianûa gh’ëa un vasto lago:
E a rende quello scito ciù ridente
Creôu gh’aveiva a posta ô Genio mago
Un nêuvo clima, un nêuvo çê schillente
Ciù assæ do nostro e d’un turchìn ciù vago;
E ciù netto e ciù dôçe, un nêuvo ambiente,
Che illûminava ûn nêuvo sô de quello,
Ch’ô l’illûmina ô nostro, ancon ciù bello.
78
E a scena a presentava ûn colpo d’êuggio
Da ispirâ ô dio do canto e da pittûa:
Paiva che a fâli ô Genio ô fesse ô spêuggio
De quanto gh’è de bello ne-a natûa...
Vegniva zù d’in mezo a ûn grosso schêuggio
(Fontaña ch’a l’ëa in fondo da cianûa)
A strisce, a spruin de neive, a fie d’argento
L’ægua, ch’a l’ëa do lago l’alimento.
