 |
Questa pagina a no l'è stæta corretta. | |
IV.
Quanto ciù de Zaniña diggo e scrivo,
Tanto ciù ghe sarǽ sempre da dî.
L'è bella per sett’atre e ciù gentî:
L’è sempre fresca comme un semprevivo.
Che maraveggia è donca, se ne vivo
Bello invriægo e matto da spedî?
Se, quando sarǽ tempo de dormî,
Son ciù desciao che n’è l’argentovivo?
Fǽ cointo che l’è tutta pignoretti:
Se ra gora per sorte ghe mirǽ,
Ra vei tutta scciovî canestrelletti.
In somma, chi non sa cose se sæ
Questa, chi me fa fâ tenti Sonetti,
No sa cose sæ Amô ni caritǽ.
