O Cicciollâ 1930/A Fûgasetta
| ←A-a Campanassa | O Cicciollâ de A Fûgasetta de Giulio Manoælo Minuto |
Nostalgia→ |
| lasciòu inalterâ a grafia do "Cicciollâ". |
A Fûgasetta
Se d’inverno, ao fà da seja,
O in sce l’öa do mêzogiorno,
Quando a famme a l’isa a veja,
L’appetitto è de ritorno,
Ve trovaê lì pe Via Pia,
Proprio in fondo a ûn carogetto,
Ve sentiei comme ûn tìa-tìa,
Comme ûn lasso de sorchetto,
Pe ûn profûmmo arcàno e fin,
Da ûnn-a poëla sempre in boggio,
Pinn a d’eûjo verzelin,
Da innondâ tûtto o caroggio.
Questa poëla portentosa,
Vorriâe dì proprio « eclatant »,
A ve serve sempre a josa
Quello Cibo Lucullian,
Volgarmente dito « Fette »;
Ma o portento ciû compìo
L’è a creazion de fûgasette,
Che veddei, con gesto ardìo,
Sventrâe comme da sciabrâ,
Imbottie de fette d’öu,
Spanteghâe ben ben de sâ,
Fra ûn oudô chi va ûn tesòu.
Benedetta a fûgasetta,
Ch’a te lêva a famme sccetta,
Ch’a te scenta in t’ûn sciûsciamme
Tûtti i microbi da famme;
Ch’a ristora, ch’a ravviva,
Stûzzicante, aperitiva.
A va ben pe-o milionâjo,
Pe-o pessente e l’operajo,
E a contenta tûtti quanti,
Chi n’ha pochi e chi n’ha tanti.
Collocando a-o stesso stallo
L’avvocato cö « Camallo ».
A l’è mëgio che o caviale,
Ciù gûstosa che o pigneû,
A l’è ûn piatto, vêo ideale,
Pe i gardetti e pe-i figgieû.
Pûro orgoglio Savoneise,
Privativa Cicciollâ,
In ta « Cuxinea Zeneize »
A n’è manco mensûnnâ!
Viva dunque a Fûgasetta,
Ch’a te lêva a famme sccetta.
E a disponn-e cian cianin
A-o boccà do Nostralin.