Ms. Ricci 1080-2/Sodi e grossi in man piggiè
| ←torna a l'endexo | Ms. Ricci 1080, sec. XVIII Mascara dre donne dra Misericordia |
Canzone sopra quelli che hanno il Morbo Gallico→ |
1.
Sodi, e grossi in man piggiè
per impì i sacchettin
domme mè per i meschin
che à ro schuo stan chiavè.
2.
Arvì l'oeggio dra pietè
donne belle à ri prexoin
che son nui incarzerè
con duoì grossi sonnaggioin
che stan fuoera dre prexioin
bello sotto ro Poistè
3.
e n'han tanto barconetto
da cazzà ra testa nua
per rescioro un pertuzetto
non ghe dà a gente crua
si la dentroo se ghe sua
de zenà, che pà d'estè
4.
e chi dà non ghe vuoè schui
ghe pò dà quarche robetta
da crovì i membri nui
ne gh'importa ra streitezza
se ra vitta ghe pon mette
n'han d'avanzo questi tè.
5.
S'esti nui incarzerè
driti innanzi, donne, havessi
cianzeressi de pietè
e re porte gh'arviressi
montà sciù ve ri faressi
in ca' vostra in caritè
6.
E biè re zovenette
che prexioin de fuoea tran
e in ca' sò se ri fan mette
e ri lavan de sò man
e s'han fame ghe ra tran
e ri vestan despoggiè.
7.
Per i nui prexionè
deì mesciave tuttavia
aora avanti, aora inderrè
corre à fà l'opera pia
ra qua v'arve quella via
ch'à ra fin ve fa beè.
8.
Ro suuò che v'esce fuoè
in servixo d'un prexon
in dolsezza o cangia puoè
che o fa fruto tanto bon
c'hommi, e donne fà non pon
megio fruto in terra muoè.
9.
Quella vostra facurtè
si profonda, e larga haveì
che se à mille vuoì ne dè
ninte à vuoì ve lasciereì
senza danno donca puoeì
fà gran ben si non ro fè.
10.
Se han da vuoì a so requesta
questi nostri prexonè
ghe virreì drizzà ra testa
e pregà per vuoì à ro sè
fero donca vorentè
per che à ingrati o ben non fè.
11.
Ma ro tempo è chi perduo
che se andemmo ciù pregando
che gustè de veine un nuo
drito innanti lagrimando
de sciugaro ben cianzando
donne crue n'ingrasciè
12.
Se ben crue tanto seì
quanto belle de natua
per ben vostro à ro men deì
d'esti nui tegnì cua
che ve renden con usura
quello ben che vuoì ghe fè.
13.
Quenti d'esti prexioin nui
dentre tanne missi son
netti, grossi, rossi, e drui
puoè se n'escian come pon
che ciù mezi non ghe son
tanto dentro son sciughè.