Ms. Ricci 1080-2/Donne amorose e belle, che fè nasce
| ←torna a l'endexo | Ms. Ricci 1080, sec. XVIII Maschera dre Mamme che s'accordan pre allevà Figgioè |
Mascara dri Tescioeì dre Teire→ |
1.
Donne amorose, e belle, che fè nasce
dro vostro sen bellissimi figgioè
e in lò come conven vorreì renasce
e in lò murtiprica come De vuoè
se non vorreì dre vostre tette pasce
quelli figgioè, che v'escian da ro cuoè
deneri à nuoì, che bonne Mamme semmo
che in carne presto à vuoi i renderemmo
Se vorreì, che v'allevemmo
quarche vostra creatura
con bon lete, e bonna cura
ingrascià ve ri faremmo.
2.
Ben v'usemmo in carne mette
ro figgioè come gustè
e re coescie, e re gambette
dure e grosse ghe trovè
si che quando ne ri dè
dentre muoen cresce i femmo.
3.
Cuoescie, e gambe sode, e drite
han i nostri figgiorin
ne don d'este sinse frite
erinette, e derixioin
ma si grossi, e gaggiarduoin
che un b ne basta à carregà
4.
Nature hemmo dose, e bonne
come haveì ra mamma vuoè
Semmo nette, e zovenonne
come gusta ro figgioè
gran lete havemmo, e primeionne
chi non usa muoè mancà.
5.
De toccane ro tettin
vuoì gustè madonne assè
pre che l'hemmo sodo, e pin
ma forte vuoì gustè
che se in man ve ro piggiè
quanto lete ne fè trà.
6.
Nuoì che lete hemmo si pin
ro tettin sodo, e novello
che chi spremme un pochettin
n'esce fuoea dro gaiello
un verroggio, un sbriscioiello
che a ciù d'un ne puemmo dà.
7.
Ro figgioè con tanta cura
nuoì ninnemmo tuttavia
che ciù dose a natua
no fe muoè tà melodia
si che nuoi quando o s'astria
ro fassemmo basso stà
8.
Ra mattin se fa buon fuoego
doppo o figgioè o se desfascia
se l'è brutto in quarche luoego
se ghe forbe, che o l'ingrascia
e tetà da puoè o se lascia
puoè o se mette à fà nanà
9.
Nanna netta ninna nà
ninna ninna corbelin
ninna ninna ro mè bin
ro mè figgio s'addormià
Nanna netta ninna nà
Nanna netta ninna nà.
10.
Cresci, cresci cogietta d'oro
t'haverè a to spadetta
e derrè ro pugnà d'oro
e d'avanti ra baghetta
da tegnì ra tò becchetta
da puoeì canti scompiscià.
11.
E d'unna barchetta in mà
d'accattà gran voeggia ho
per andamene à barchezzà
che o timon tegnì ro sò
ma o mè figgioè non pò
navegà tutto ro mà.
12.
E ra bella Franceschinna
che soletta in letto stà
vuoè mario a meschinna
e pre duoetta a ghe darà
un giardin chi frutterà
chi ro fa ben lavorà.
13.
Cattainetta è ro barcon
dentro l'orto a mirà stava
un ben grosso zerzellon
si ra gora ghe tirava
puoè sull'erboro montava
pre puoi cuoeggie fruto tà
14.
Bioù ti compà Miché
chi non he villa ò mura
pre che sola a moggiè
virtuosa de natua
da sò breiga à chi n'ha cue
che a fa l'hommo despeà
15.
Ò sù sù femmo una danza
don ghirindonna don ghirindon
poescia impimose ra panza
pre puoeì fà ballaridon
che chi balla senza son
i pendin dell'aze pà
16.
E o farà a ninna netta
dormi dormi picenin
ti haverè da puoè unna tetta
unna tetta, e un bon tettin
unna tetta, e un bon tettin
che tò mamma te vuoe dà
17.
Drizza sciù ra testa, e collo
ro mè bin bonombrioso
no aggi puoia dro babollo
cha fa ra mamma sotto ascoso
che si ben l'è si peroso
denti o no ha da fate mà
18.
Ninna ninna ra mè coggietta
e ro mè pipì novello
cresci pu ra mè becchetta
ti haverè o tò canestrello
e coromba, e tortello
che tò mamma te vuoè fà
19.
Dentra villa d'Andrioè
se ghe balla, e se ghe danza
ghe canta o roscignuoè
e Bernardo ven de Franza
ch'a ammazzoù con ra sò lanza
l'oxelin de me compà
20.
Oxelin bell'oxelin
chi dro becco sempre trè
e ciorlin, ciorlin, ciorlin
dentro bosco si ben fè
che chi gode gusta assè
si te serca d'ingaggià.
21.
Ro Galetto, e bello gallo
e ambascioù dro nuoevo sò
c[']a re polle da cavallo
monta spesso per amò
e pre' fà cocorocò
sciù ra testa vuoè drizzà
22.
Dentro l'orto ch'emmo in cà
cattiv'erba è zà cresciua
e ogni cosa se ne va
in mal'ora, e desperdua
una fava semensua
sarà bonna da ciantà
23.
Dentro l'orto dra comà
gh[']e ro truoeggio, e fontanetta
che bagnando fa ingrascià
l'aggio, porro, e sevoletta
si che puoè a comaretta
se ne piggia unna pansà
24.
E l'erbetta senioera[1]
zova, e gusta à ra fantinna
che o sangue a ghe trà fuoera
chi dà breiga à ra meschinna
benche a ponze unna stizinna
ro pertuzo inte l'intrà.
25.
E Madonna Maioera
pettenà o sin se fava
e dra bella parmeioera
ingrossà ro fuso a fava
e re carcoe a menava
ben da torno à ro terà
26.
Ohime De, comà Maioera
che pre mè desaventura
ro fornà spointando fuoea
con ra para grossa, e dura
rotto gh'ha ra gattafura
si ghe l'ha feta bruxià
27.
Battaggiava battaggin
sotto gh'era ra Dianna
e da sovra frè Stoppin
chi sonava ra campanna
si ballava unna pavanna
a ro son dro battaggin
28.
Zin, zin, zin ch'a ro morin
sempre muoè ra votta o dà
e me puoeo un'atro zin
tente freccie amò me trà
ma in mà fresco ro zin stà
e mi bruxio in terra, e in mà
29.
Se ne butta in parpagion
ciera bella à man, à man
per ra via m'accompagnon
chi lavora de sò man
si ghe presta o tian
da puoi carne coxinà
30.
Ra lumassa e lumassetta
re suoè corne fuoea a trà
ni se troeva donna netta
che chi a spussa, e chi non l'ha
che chi ha e corne, e non ro sà
ben de corno puoè sunà.
31.
E ra barba de botè
e ra bella eloga zà
ma voggiando treppa liè
con un munno fuoea de cà
ro munnin ro petenà
e ro peì ghe fè croà.
32.
Lazare Lazare cappellue
possa cioeve in queste bande
fantinette, e donne nue
e fantin senza muande
che l'usà braghette grandi
spesso inganna ra sposà
33.
Se in cà pre mamma me vorreì piggià
arvine omuoè re porte donne deì
che l'hora è tarda, se ben ciero pà
pre che pà sempre giorno donde seì
e se figgioè non haveì da puoine dà
dane letto sta nuoette a ro men deì
pre che a cà nostra ro daremmo à vuoi
se ben duretto un poco l'hemmo nuoì.
- ↑ cfr. Ms. Marston 56/De messê san Tropè martiro: "E senando con verge de ferro batuo, lo so sangoe coreiva in terra"; cfr. fr. saigneur