Ms. Ricci 1080-1/13
| ←torna a l'endexo | Ms. Ricci 1080, sec. XVIII Villana |
La serva innamorata→ |
1
Sarrà treì anni esto mazzo
che m[']è morto a me Zaninna
m'ha lascioù chi nuo, e grammo
con sta figgia chi fantinna
2
E con meigo l'ho menà
per sercara d'accordà
se serchè cos'a sà fà
o pancuoetto, e peveà
3
I corzetti, e cappellassi
e lazagne,e cori braschi
e per sciorte, ò per ventua
ve farrà unna gattafua
4
E puoè serto v'asseguo
se vorressi o pan duo
ve ro fa come unna toa
tanto a fa a pasta soda
5
E puoè quando a l'assottiggia
tagliarin per a Famiggia
a fa curlà ben o canniello
c[']o pà giusto un scigoriello
6
Se vorressi dà un duisnà
à unna personna de soggietto
un pastizzetto a ve sà fà
con un zemin de sevoletta
7
O' Zaninna andemmo in villa
à guardà o bancarin
con a tazza, e a luxernetta
a cazza, o piatto, e o pugnattin
8
O' Lucchin, Sentin, Andria
barba Antogno, e Franceschin
Gioseppin, Zane Maia
Piero, Zane, Lucco, e Martin
9
Franseschetta corrì in fretta
va à piggià quello scosà
che besuoegna, che m'investe
c'hò d'andà à esse comà
10
Mettite sciù quello busto
chi è dro corrò dro ponsò
che non vuoeggio ch'in a valle
ghe ne sè come ro tò
11
Corrì tutti Fuenti, e Fuente
comenseve à remengà
e lavè tutte e scudielle
quanti piatti seglie in ca'
12
Corrì presto ba' Fransesco
à trovà o ba' Lazà
chie ve dagghe a paniea
ch'a serrà intro bancà
13
Aora zà che con maniea
vuoì me l'eì zà domandà
se ve daggo a paniea
ce a vuoeggio consignà
14
Ve consigno tre paette
sinque veste d'oinà
quattro, sinque, ò sei camixe
unna scoffia con un colà
15
Duoi ramaioè, unna caderetta
con tre fuse da fià
unna cazza, c'unna zapetta
per che o posse ammenestrà
16
E ro nievo, che ghe piaxe
per miegio a festa fà
trè quarte de brenno all'aze
stamattin o l'ha feto dà
17
E l[']abuò non ghe vuoè fà torto
ma pre miegio faghe onè
o l'ha feto ammazzà un porco
p're fao cuoexe con savò
18
Franseschetta corrì in fretta
va à piggià quello tian
pre portà à ro forno a testa
c[']a sè coetta pre doman
19
O figaetto intra puoela
o fareì ben rostiggià
che con un spigo d'aggietto
l'aggiadda gh'oggieme fà
20
A coà l'è un desbaatto
non a cuxeì, lasciea stà
che l'alluego pre o gatto
che ancon liè s'ha da sciallà
21
Osciù donque i miè Signouì
L'è tosto lesto o disnà
commensè à piggià i stromenti
che a sposà vuoè un pò ballà
22
Ciammè un pò o ba' Tognollo
chi ne porte Michelin
chi ne piggie o scigoiello
con ra musa, e o Tamborlin
23
Deghe zù à quelle ingonaglie
e sunè s'orreì sunà
se no sinque, ò sei sunagli
presto vaggo à piggià à ca'
24
Deghe zù à tutti i muoei
che voeggio che balle a sposà
c[']a l'ha unna panzà de coi
cha pà che a vuoeggie creppà
25
Non ghe fè miga gagiarda
pre che liè a non a sà fà
feghe musa à ra Lombarda
ch'è[sic] l'è usanza de Vadetà
26
Picche, schae, zappe, e schiele
comensene à piggià
e con sinque, ò sei faxielle
che a sposà se ne vuoè andà
27
O' Lazà dra bocca storta
corri presto, fatt'in sà
porta o lume in sciù ra porta
pre fà lume à ra sposà
28
E puoè quandoa l'undeman
a sposà ne fa levà
da o puoere a va cian cian
e comensa à sospià
29
Puoere miè cose m[']ei fuò
mi son tutta astrumazzà
che Tognin pre mè sposoù
m'eì vosciuo pre forza dà
30
Ho ri oeggi à mieze masche
si son tutta allandrigà
ne aspettè, che ciù me gratte
Puoere miè m'oeggio purgà
31
Sciù mandè à ciammà ro miego
se ro ben me vorreì fà
che un'inciastro sciù a piezo
pre o manco o me farà
32
Così a l[']e restà d'accordio
zà che liè se vuoè purgà
o sò miego l'è Bettordo
chi l'è andeta à visità
33
Ben vegnuo messè Bettordo
dime un pò cos'ho da fà
piggiè o brazzo, che ve porzo
se o poso m'orreì toccà
34
Sarà quexi quattrosent'anni
che sei tutta astrumezzà
Lasciè un pò veì ri carcagni
che megio ve posse fà
35
Vuoi patì dro mà da testa
eì a muoere assè arraggià
intra panza gh[']eì unna gatta
meza coetta eì à coà
36
Ciammè un pò a commà Lucretia
pre che mi vuoeggio ordenà
atre cose che refreschan
pre che possè vuoi meggiorà
37
Sciò dottò con chì che tio
dime un pò cos'ho da fà
s'ho da cuoexe, ò fà boggio
cose diavo ho da inciastrà
38
Menta, persa, e valaianna
meza zucca maxinà
con trè peie dro ba' Pedanna
tutt'insemme eì da mes[c]cià
39
Zucche gianche, zucche more
con sinquanta peveioin
e novanta piè de coi
con unna quarta d'armorin
40
Puoè piggiè unna pugnattinna
chi non sè guei remenà
con unna quarta de fainna
chi sè steta zà in bugà, ò siassà
41
Puoè mesciè tutt'insemme
e se questa non ghe và
puoeì pregara ch'ha se spremme
se dro corpo a non puoè andà
42
Miezo rubbo de puintette
con un quartetto de buoè
trentatrè castagne secche
d'allegraghe un pò ro cuoè
43
Se pre caxo o mà de muoere
a piggiasse in strangoscion
ammasseghe un mazzapreve
con sinque ae de moscon
44
Fè rostì mieza sigaa
che sè coetta, e assassionà
con treì manneghi de paa
che sen da rovere nostrà
45
Da puoè feghe un'insallatta
de retaggi de Guantè
e bruxeghe un pò de strazza
se pre sciorte a n'ha mestè
46
Se a meixinna a ghe fa torto
che a non posse meggiorà
ch'a non posse andà dro corpo
quest'atra cosa gh'eì da fà
47
Vintiquattro orive de Spagna
cuoette intre l'egua saà
con dra pota de castagna
chi sè spessa, e ben menà
48
Piggiè chinse leitughe
che sen nasciuue da Denà
trentequattro indiviette
tutte cuoette da o Fornà
49
Piggiè chinze ravanetti
trentasei pesci saè
che sen cuoetti così schietti
che così sarrà assè
50
Sciò dottò tante ressette
gh[']emmo feto aora provà
ma pre dane e bonne feste
à l'atro mondo a se vuoè imbarcà
51
L'è ben assè che tante cose
no gh'aggian posciuo zovà
comenzeghe à sunà e pose
pre portara à sotterrà
52
Non perdemmo aora ciù tempo
zà che mi ho da strappassà
pre che un pò d'attestamento
serto che mi vuoeggio fà
53
Ciammè un pò o scrivan dra villa
l'arsipreve, e o Rettò
e me suoè, ciammà ra Lilla
che così sarrà meggiò
54
O Preve Zane, o Preve Fransesco
o Preve Lucco, o Preve Simon
Preve Ghigiermo, e Preve Battesto
e Preve Zane vegne ancon
55
Sciò scrivan steme un pò attento
e piggiè a penna in man
pre che un pò d'attestamento
vuoeggio fà così cian cian
56
Primamente e mè raxoin
serto che e vuoeggio fà
in fra tutti o me Tognin
pre Patron voggio lascià
57
De sinquanta lire de duoetta
che me Puoere m'ha vosciuo dà
lascio che o paghè unna cuoetta
de polenta à o fornà
58
A Lucchin chi è steto accorto
chi non m'ha vosciuo abbandonà
mi ghe lascio miezo porco
con a scoffia dra commà
59
Lascio ancon à o ba' Tognello
chi m[']è vegnuo à visità
un Tambuo, e un scigoiello
con e braghe de mè compà
60
A Lazà dra bocca storta
pre che quando ero spozà
o m'ha feto lume à ra porta
mi ghe lascio l'oinà
61
A me suoè Cattainetta
ch'ha se posse maià
mi ghe lascio a zapetta
con o torzio dro moinà
62
A o convento dri Fratti
pre che me vegnan à piggià
mi ghe lascio treì chen bracchi
pre che possan andà à caccia
63
E a quello beccamorto
chi me porterà à sotterrà
mi ghe lascio miezo porco
con a trippa, e o bielo cuà
64
Un pà de buoè con unna lieza
lascio à o Messè Labuò
pre che intro bosco da Miega
sento baxi liè m[']à duò
65
De ciù lascio un'atra zucca
ch'era dro compà Zenà
quando l'era sbirro à Lucca
con o nievo da mè commà
66
E zà che non gh[']è ciù ninte
addio me vuoeggio accommodà
pre puoeì ben tirà e strinche
e me ve vuoeggio arrecomandà
67
Addio donque à tutti quenti
zà che mi ho da strappazzà
v'arrecomando i Fuoenti
che non i lasciè andà à strà
68
Bonna seia à o compà Zane
addio tutti i miè vexin
ve prego che oggiè scusame
à reveise à doman mattin.