Ms. Marston 56/Mirachullo (29)
| ←torna a-a l'endexo | Manoscrito Marston 56, 1465 Mirachullo de la biâ Vergem madona santa Maria |
Mirachullo de la biâ Vergem madona santa Maria (30)→ |
| azonto maiuscole, pontezatua, tratin inte forme interrogative e diacrittichi (segondo a prononçia do XVIII sec. e e reggole do Prien do 1745; ecetto "ë" = æ, "ö" = œu); lasciao a tirde in sciâ "n", in corscivo i atre ligatue, in apiçe e coreçioin posterioî; tra e parentexi quaddre e lettie da azonze, tra e tonde quelle da esponze; |
O fo um cavaler chi avea tuta la soa richessa consumâ, e de monti famigi che o sorea tegnî, o vègne a tanto, che ello era soreto con la soa dona.
E lo demonio ge aparsse in similitudem de um servente, proferiandose a li söi servixi, se elli ge fossem in piaxe[sic], e temando questo segnô de reseive li servixi de um zovem chi pareiva de tanto valor, seando vegnuo in povertae, pu o consentì a la so requesta de vorentae de la mogê, e per che e' digai monte parolle avanti che lo segnô fosse la matin levao de leto, questo serviciâ vegniva da la serva con serte chasaxoim de bestie tai da mangâ e tae da vende, e in questo modo e in atre gize lo so segnô inrichì tanto q che ello avea pu cha avanti. E semegeivementi o fè fâ um gram paraxo, unde ello e la soa dana[sic] e la famiga faxea stare[sic], e lo segnô se alegrava de questi servixi.
Or o cheite che in quelli di, monti perlati andavam a lo rè de Franssa, inter li quai ne era um savio vescho (vescho) de Arbenga chi abregà in caza de questo cavaler, lo quâ avea per li tenpi passai inteizo de li servixi de questo servo. Ma alaora li como li fati avanssavam la fama, e che li affani de monti homi in ello non stanchavam, comenssà a maravegasse e avei suspessiom de che o non fosse quello che ello era.
Alaora questo vescho pregava devotamenti a la nostra Dona e a lo so Figör che la veritae de queste cosse ge fossem maniffestae. E vègne tenpo che una seira andando questo famigo con lume in man a lo nessesario davanti a questo vescho, la luna si era in quello pointo roanda e monto splendente.
Alaora lo vescho demandà a questo servicial quanto ello avea, e lo servo respoze quanto ello avea lo di de la soa sarvaciom, lo qua lo vescho disse: "Unde sai-tu questo?" E ello disse che ello ge era staito prezente. E alaora questo santo homo dubià monto, ma o se ne vègne infenzandosse de non intende quelle parolle, e retornà a la soa gente pregando Dee e la Vergem Maria, che avanti che o non sea examinao, che quello servo non se possa partir.
Alaora questo santo vescho si fè vegnî la cavarê e lo servo, e vegnui che elli fon, e' l'incomenssà a sconzurâ lo servo de la parte de Dee onipotente, che o ge devesse dî chi ello era.
E alaora lo demonio se manifestà, e disse che o serviva questo cavaler con questa intenciom, e che quello paraxo e l'avea faito in quello lögo che stagandoge dentro con monta gente congregai a mangar asochè o fosse mao la ruina e la perdiciom de la gente e de le anime, quando e' l'avesse misso quello paraxo per terra.
Ma per caxom de le oracioim e limoxine e caritae che lo so segnô fava contuniamenti per lo amô de la Vergem Maria, o non aveiva anchora possuo conpî la soa rea intenciom.
Alaora questo santo vescho da parte de lo nostro Segnor Dee e de la soa santissima Maire ge disse che tuti quelli bem che lo demonio ge avea daito, che o li butasse via, e tuti quelli bem che ello aveiva aquistao per raxom drita se ne investir questo cavarê, e pöa o comandà a lo demonio che o zeisse in fondo de abiciom. Alaora lo demonio zità föra um crio si teriber, che tuti quelli chi eram in lo paraxo avem grande poira de subitanea morte, e cossì o se partì lassandoge lo corpo morto, lo quâ e' l'avea portao cotanto tenpo morto e spusorento. E pöa lo santo vescho se misse in camin con grande alegressa e la cavaler romaze pössa con tuta la soa famiga in amor de Dee e de la soa santissima Maire santa Maria.