Monumento a Cristoforo Colombo 1845/1
| Monumento a Cristoforo Colombo de CANZON I. |
CANZON II.→ |
| Zena, Sordo-mutti, 1845 Exemprâ conservao inta libraja Beio de Zena |
CANZON I.
Ne-ö dî cose stupende
Di ommi celebri morti
Pù che n'aggian da spende
Pe statue e monumenti!.. .
Uña voxe da tanto e de tanti
Per a patria e pe-i sommi zelanti
De ripete a no lascia un momento:
A Colombo ö se fa un monumento?
O s'onora quell’ommo immortale,
Che l’eguale — in Europa ö non ha?
Giubilæ, çittadin, ch’ei impegno
Che s’onore di Grandi a memoja:
Dæ pù segni de gioja, chè un degno
Monumento a Colombo ö se fà!
Da tanti anni ö foresto chi arriva
De Colombo ne-a tæra nativa
O dimanda e poi torna ö dimanda:
Dove s’erze, in che ciassa, in che banda
O colosso do primmo di Eroi
Non mai primma, nè poi — superou?..
Rallegræve, o Zeneixi, che presto
Uña statua a Colombo innalziemo;
Nè sentiemo — ciù di da-ö foresto:
Non è in Zena un Colombo onorou!. .
Son passæ za trei secoli, e inqueta
A ö dexidera a patria e a l’aspeta:
Ogni bravo Zeneize ö ö sospia,
E con zelo e con enfaxi ö cria,
Se l’infamia non mai se scancella
Da-a ciù bella — de tutte e Çittæ!...
Çittadin, s’avvixiña ö momento:
Se matura zà un’opera eterna:
Se n’esterna — pe Zena ö contento:
Tulli i bravi ne son consolæ.
Solo ö sordido avaro ö se rode,
Mentre I’ommo gentile ö ne gode;
Perchè troppo a un cheu vile ghe peiza
De concòre a-a magnifica speiza,
E ö deludde l'inyito molesto
Con pretesto — ciù vile de lê.
Se gh’associa l’ingrato e ö stordio,
Ch’ö ne dixe: chi è questo soggetto
In concetto — de sommo e de pio,
Che i fanatici portan a-ö Çê?..
Oh ignoranza!.. oh avarizia nefanda!
Chi è Colombo un Zeneize ö dimanda? . .
Un Zeneize ö mogogna, e ö s’offende,
Se pe-a gloria d’un sommo se spende,
Se s’onora d'un Grande a memoja,
Che l'istoja — a no mostra un maggiô?
Chi è Colombo?.. A-ö gran Nomme a diversa
Gente, sparsa a-ö de là de profonde
Onde — Atlantiche, lagrime a versa
Che son figge de gioja e d’amô!
Chi è Colombo?.. L’America a ö vanta.
Chi è Colombo?... L’Europa a ö decanta.
Chi è Colombo?... Che paize, che tæra
Di doì mondi ne-ö gio se rinsæra,
Ch’ö n’esalte ö gran nomme glorioso
Do famoso — che ö neuvo ö trovò?
Dall’Antartico all’Artico polo
De Colombo l’è celebre ö nomme!
Comme — dunque se treuva, che solo
Poca stimma lê ö gode fra i sò?
Chi è Colombo?... Da-e fertili sponde
D’Orenoque e do Rìo ve risponde.
L’ommo primma sarvægo e brutale:
L’è Colombo ö sublime mortale,
Ch’ö me fè d’antropofago e vile
Ommo probo, civile — e d’onô;
Che mostrandome a croxe de Cristo
A despeto da sorte crudele
O me fè d’infedele — e de tristo
Un seguace do mæ Redentô.
Chi è Colombo?... Inrichie di tezoi
Dell’Oceano, ö l’è ö primmo di Eroi,
Ve rispondan e Spagne, che un Mondo
Attraverso d’un mâ senza fondo
O trovava, non cognito a tanti
Naviganti — che Europa a vantò;
Lê ö marittimo eroe che de tanto
O vinçeiva de Cortez e Gama
A gran fama, — e ogni impreiza e ogni vanto
Di ammiraglii i ciù illustri ecclissò.
Chi è Colombo?... L’Italia e a Brettagna
Ve rispondan co-a Fransa e co-a Spagna:
Lê a chi naviga incognite corse,
Lê a chi traffega neuve risorse
O mostrava, associando doi mondi
Da-i abissi i ciù fondi — stacchæ.
Quanta gente in Europa infeliçe
A trovava ne-a tæra scoverta
Da Colombo uña çerta — e feliçe
Suscistenza, recuvio, e dinæ.
Chi è Colombo ?... O ciù intrepido e ardio
Ammiraglio in Europa sciortio.
Per Lê Zena famosa a l’è tanto:
In Lê solo a Liguria a l’ha ö vanto
D’avei dæto all’Italia un portento,
Ch’ö l’unisce de çento — e virtù.
Mille nobili eroi gh’emm’avuo:
Per lô Zena e Çittæ dell’Italia
A l’egualia! — da ö volgo nasciuo
O l’illustra Colombo ancon ciù.
E pe un genio sublime e distinto,
Che incredibili incontri ö l'ha vinto,
Ch’ö fè stabile a gloria Zeneize
Co-a ciù bella e a ciù vasta de impreize,
L’è un Zeneize coscì indifferente,
Negligente — ö se mostra coscì?...
Coi nemixi da patria l’ingrato,
(Ahi vergeugna!)[sic] ö l’andià congiurando,
Mogognando: — a che fin tanto sciato?
Tanta speiza a che oggetto? per chi?
Per chi tanto?... Eppù a França tesoi
A versò pe-èö maggiô di sò Eroi,
Che pe rendise scciavi i potenti
Sangue umano ö versava a torrenti,
Ch’ö fè vittime tante d’amixi,
E nemixi—a-a sò immensa ambizion.
E poi sæmo noi prodighi forse
Dando ö premio d’un merito sommo
A un grand’ommo — che in membri e risorse
Ha inricchio societæ e religion?
Ne pâ troppo, se a gloria compimmo
De chi onô ne façeiva pe-ö primmo!...
Ah! uña maccia da tanto in noì fissa,
Che a ciù bella de glorie a n’ecclissa,
Via uña votta, o Zeneixi, levemmo:
Riparemmo — di antighi l’errô.
Quanto tardo l’è ciù ö monumento,
Ch’ö scie tanto ciù bello e ciù raro,
Quanto a-ö sbaglio ö riparo — è ciù lento,
Ch’ö scie questo un riparo maggiô.
.jpg)