Lunaio Regiña 1890/A Töre Eiffel
| ←A bandëta | Lunaio zeneize compilao da-o sciô Regiña & C. pe l'anno 1890 A Töre Eiffel |
Tûtti i mestê son vegnûi diffiçili→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
Comme a töre de Babele
Tra dûxento e mille sbraggi
A creäva di lenguaggi
Quella strana confûxion:
2.
Questa töre, chi scompassa
In altessa ogni atra töre,
Da gran gente a fa che cöre
A-a mondiale Esposizion.
3.
E pe däghe ciû reçiammo[sic]
A l'è in mostra ne-e veddrinn-e
De bûtteghe pariginn-e,
E da-i nostri pastiççê.
4.
I françeixi l'han costrûta
Pe fä vedde che son vivi,
Pe provä che no son privi
D'aspertixe ne-o mestê.
5.
I travaggi mäveggiozi,
E stûpende gallerie
Son gôffate che fan rïe
Senza töre in mëzo a lö!
6.
Questa töre pä ch'a digghe:
Viva l'anima da Franza
Che di tacchi ghe n'avanza
Pe toccä co-a testa o sô!
7.
S'a costava sei milioni,
Do gran tempo e da fadiga,
Tanto dûbbio no gh'è miga
Che i françeixi rimettiàn.
8.
Quande i cadi e o mä nervoso
Ghe fan croä ciû d'ûn cavello
Pe rescioäse ûn pö o çervello
In sciä töre se n'andiàn.
9.
Lasciû porrian pe-i primmi
Descrive i cangiamenti,
L'aspetto, i movimenti
Do çê, da tæra e o mâ.
10.
Sçiccomme[sic] poi da fûrbi
Ne-a primma galleria
G'han misso trattoria,
Ghe redoggiàn dinâ.
11.
Lasciû veddiän a Franza
Stâddioza, intelligente;
Sentiàn da tûtte e gente
Mandäla a-i sette çê.
12.
Lasciû sentiàn scöxila.
S'a fa da boggibreiga,
Se quarche brûtta ceiga
A çerca de piggiâ.
13.
Lasciû porriàn sfogäse,
Sbraggiä comme ghe piaxe,
Chè tûtte e gente in paxe
No s'occupiàn de lö.
14.
Lasciû veddian che o mondo
S'avian da prepotenza
O no pêu fäne senza
De däghe ûnn-a lezion.
15.
Oh töre mäveggioza,
Oh töre sorprendente,
Miracolo vivente
De celebri invenzioin,
16.
Se da l'enorme altessa
Ti é færma e ti no scrolli,
Pêu däse che ti molli
Se te ghe mollan lö!
17.
Ma spero che ti seggi
A stella lûminosa
Che l'äia borrascoza
Ghe mostre dä lontan.
18.
Spero che stando a Franza
Lì queta ne-e sò straççe
Un gran servixo a faççe
A-o mondo, a-a çiviltæ.