Lunaio Regiña 1889/Prefazion
| Lunaio zeneize compilao da-o sciô Regiña & C. pe l'anno 1889 Prefazion |
Revista da çittæ→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
Viva Crispi! Viva Checco
Che, ne-o mentre son a secco
De notizie strepitoze,
De trovate spiritoze
O me dâ l'inspirazion
Da presente prefazion!
2.
Viva lê, che, fortûnnôu,
Façilmente o l'e arrivôu
A mostrâ che l'ëa poscibile
Festezzâ Romma intangibile
(Battezzâ pe ûn'utopia)
Ne-a famoza Porta Pia!
3.
Con ûn tale avvenimento
O mosträva do talento,
Do coraggio personale;
De l'orgoglio nazionale
In to popolo Italian
Derimpætto a-o Vatican.
4.
O mosträva che a Romagna,
Battezzâ pe pöco stagna,
Pe incostante e tûrbolenta,
Pe contraia e mäcontenta,
A viveìva in santa ûnion
Con o ræsto da nazion.
5.
Lûgo, Rimini, Forlì
E ciù paìxi chi è per lì
All'arrivo do re Umberto
Non andæti de conçerto
Ne-o mostrâghe scimpatïa
A amicizia a ciù squixïa.
6.
Paìva zà che l'Ottantêutto,
Benchè pigro e chêutto chêutto,
O cacciasse ne a cädëa
Da politica Europëa
Mille triste previxioîn
Pe gran parte de nazioîn;
7.
Moìva o vëgio Imperatô
Da Germania; e con gran dô
Moìva o nêuvo Ereditaio
Proclammôu pe necessaio
E pe prïa fondamentale
D'ûnn-a päxe generale;
8.
Ma Guglielmo, o nêuvo eletto,
Professando ûn gran rispetto
A-a memöia di sò morti,
Con penscëi sublimi e forti
O se däva do gran fâ
Questa päxe a conservâ.
9.
A da tûtti festezzôu
In te Romma o l'é arrivôu
Pe mostrâ che l'alleansa
Da sciä Rûscia e da sciä Fransa
Comme röba prevegnûa
A l'andiâ fïto in ta pûa.
10.
Ancon primma ch'o vegnisse
No creddemmo che dormisse
A politica italiann-a
Che con l'oëgia de campann-a
Se ne stava lì a sentî
L'orso e o gallo discorrî.
11.
Mentre a Fransa pe brûxô,
E pe pûnzine l'önô
A-a trattava da ineguale
Ne-a tariffa commerciale,
A stimmava, sensa sciäti
De respinzighe i trattati.
12.
Quande a Tûnixi a sciä Fransa
Con a solita arrogansa,
Pe mostrâ donde ghe dêue,
A l'intrava in te sò schêue
Con l'idea che l'unitæ
Ne negassan i emigræ;
13.
Là speddindo e mëgio scioî
Di sò meistri e professoî,
A mostrava francamente
Che l'Italia indipendente
A l'aveìva ogni diritto
De no fäse ciù dî: sitto!
14.
L'è però da deploräse
Che miggiæa de facce fäse
Çercan tûtto pe astissane
Co-a nazion che pe aggiûttane
A corrïva, in fin di fin,
A Palestro e a Solferin.
15.
Da gran tempo tûtti san
Che Bismarche da-a lontan
O ghe semina a zizzania
Pe fâ tanto che a Germania
Co-a santiscima alleansa
Sofocâ vêuggian a Fransa.
16.
Fæto stà che tûtto o mondo
Rivortôu da çimma a fondo
O no quëta pe-o spavento
D'ûnn-a päxe in armamento
Chi pêu aveì pe conclûxion
Unn-a gran rivolûzion.
17.
Fæto stà che no se pêu
Mai leväse de da-o chêu
Quest'affanno chi n'opprimme,
Chi ne röde comme e limme;
Fæto stà che, comme o lûmme
I guadagni van in fûmme!
18.
O passiâ l'Ottantenêuve
Sensa däne brûtte prêuve
De capriççio e d'incostansa?
Sciscignori, perchè a Fransa,
Pe mosträse a Grand Nation,
A faiâ l'Esposizion.
19.
In Pariggi a gran çittæ
Ghe scûggiâ di gren dinæ.
Pe-i giornali se discöre
Ch'a l'ha fæto ûnn-a gran töre
Ch'a l'arriva scinn-a a-e stelle
E a pä quella de Babelle.
20.
Tra o gran sciäto di lenguaggi
Faian vedde bisce e baggi?
O mettian ûn pö prûdenza?
O mostrian ciù tranzigenza
Sens'assiâ delungo o can?
Oh, ch'ammian quello che fan!
21.
O Novanta o no passiâ
Sensa l'ægua impätanâ.
Dio n'avvarde da-e bûrrasche,
Da-e caresse, i bäxi ë frasche
D'ûnn-a guæra sanguinoza
Pe l'Europa, è disastroza!....
22.
Viva Italia e i giorni bælli
E o ministro Zanardelli
Che con löde ûniversale
Dàn ûn Codice penale
Che ciù santo pe-o passôu
No n'é stæto compilôu!
23.
Viva Italia, s'a pensiâ
De no spande e no straggiâ
E finanze nazionali
In conquiste coloniali
Che con tanto fâ do sciäto
Dàn ûn grammo risûltato!
24.
Viva Italia, se con flemma
A pensiâ che gh'é a Maremma,
A Romagna co-a Sardegna
Che con vöre d'amô degna
Ghe domandan ciù premmûa
Pe-a languente agricoltûa!
25.
Viva Zena, a ma çittæ,
Ch'a l'appægia zà i dinæ
Pe-e gren fæste Colombiann-e,
Che tra i ciocchi de campann-e,
Che tra e mûxiche, tra i späri
Ghe portian di boin affari!
26.
Viva, viva o sciô Reginn-a
Che mettendose a marscinn-a
O faiâ ûnn-a revistetta
Da çittæ co-a Cattainetta!
Viva lê, che con rxon
O finisce a Prefazion!