Lunaio Regiña 1888/O baxo
| ←O primmo cavello gianco | Lunaio zeneize compilao da-o sciô Regiña & C. pe l'anno 1888 de O baxo |
O mondo di Lillipuzien→ |
Sûnetto
Da quell'avvixinä bocca con bocca
E mandâ in ciocco, s'argomenta o baxo
Che dæto de consenso e dæto a caxo
Da che parte se sæ, l'anima o tocca.
Ma l'insegnäve a mi no me pertocca
Se doveì dälo fîto o dälo adaxo,
Se con ciocco soäve o con raväxo,
Per c'ho ciù poco lin in sciä mæ rocca.
O baxo o l'é ûn segnale de l'amô,
De l'amicizia vea, de l'affezion
Tra parenti e personn-e do sò cô.
L'é someggiante o baxo a ûn'armonia
Donde gh'é tûtta l'instrûmentazion
Chi canta e rïe, chi cianze e chi sospïa.
V.