Lunaio Regiña 1885/In Löde di Cappoin

←Segnô, Ve lödo e Ve ringrazio!

Lunaio zeneize compilao da-o sciô Regiña & C. pe l'anno 1885 In Löde di Cappoin

Se foïse...→

Zena, Tip.-Lit. di Fræ Paghen, stradda Luccoi , n. 52 - exemprâ conservao inta Libraja Naçionâ Centrâ de Romma

IN LÖDE DI CAPPOIN

---

De là passôu i Santi
Bell’accattä i cappoin
Pe fä che ûn meize avanti
Possan vegnî ciù boin!
Eì tempo da levâghe
Quello sarvægo c’han,
Eì tempo da pûrgali
Con fêugge, broddo e pan.

Se gh’eì ûnn-a ciassetta,
Un tocco de sûiêu,
O quarche terassetta,
L’è quello che ghe vêu.
A-o ciæo dell’äia averta
No creppan dä pascion,
E s’impan ben o göscio
De brenno e menestron.

Se levan tûtti i sasci
Con tûtto o revezzêu,
E vegnan belli grasci
Ciû che da-o pollaiêu.
Crescian ä vista d’êuggio
Che no ve n’accorzeì,
E pe allevali poco
E ninte ghe spendeì.

In to cantâ di galli
Pä che sentï trottâ
De squaddre de cavalli
Lì drento in lo pollâ.
Ve sciortan fêua de liste
Co-i ciûffi spampaggiæ
E rompan a cantiëta
Do brenno da-e becchæ.

Chi o l’è chi no se sente
De criä viva i cappoin?
Ammiæ che brava gente!
Ammiæ comme son boin!
Appenn-a ven Natale
Pä che ve vêuggian dî:
Son chì da tiäme o collo...
Da mettime a boggî!

E quande in ta pûgnatta
Son lì pe parpellä
Ve pan ûnn-a fregatta
Chi naveghe pe-o mâ.
Veddeì spuntâghe i êuggi
Do cô dell'êuio fin,
E ne gödì o bon gûsto
Con quattro fidelin.

Quand’o l'è bello chêutto
Poeì mettive a sguarä
Che se ghe foisci êutto
Cattivo contentä
Lì gh’eì da contentave
In te che stallo voeì:
In chêuscía, in portacôa,
In pëto a ciû no poeì.

Con o bitiro intorno
E duî granin de sä
Metteìvelo in to forno
E poi lasciæ ciomä.
Quand’o l’ha o cô dell’ôu
Trincælo a tocchettin;
Sentieì che morbidezza
De razo e vellûtin!

Metteìlo ä cavallaia,
Metteìlo a fraccassà,
In fæto de leccaia,
Ciû mëgio no se dà.
E de sentîghe o gûsto
D’ûghetta e de pignêu,
No me faiæ mâveggia
Se ghe lasciæ i raviêu.

Chi o l’è chi no se sente
De criä viva i cappoin?
Ammiæ che brava gente!
Ammiæ comme son boin!
Pe noî, sensa fä voto,
Vivan in castitæ,
Ingrascian, pe ingrasciane
Doppo che son strangoæ.

-)o(-