Lunaio Regiña 1885/I Marionetti

←O Depûtôu Affarista

Lunaio zeneize compilao da-o sciô Regiña & C. pe l'anno 1885 I Marionetti

Mûxica Sacra→

Zena, Tip.-Lit. di Fræ Paghen, stradda Luccoi , n. 52 - exemprâ conservao inta Libraja Naçionâ Centrâ de Romma

I MARIONETTI

---

Evviva i marionetti
E chi l'ha fabbrichæ!
Beneiti quelli ommetti
Da lö rappresentæ!

C’ûn pö de fìferetto
E quattro spaghettin
Se guidda o marionetto
Ciù grande o ciù piccin.

Comme ve pä e ve piaxe
Co-a bocca ghe fæ dî,
E se taxeì o täxe,
O dorme, se dormî.

O mescia e gambe ë braççe
Comme ghe e fæ mesciä,
E l'imbottî de straççe
O raso, se ve pä.

A lô poeì däghe a parte
Da rè, da imperatô,
Da scamottêur da carte,
Da giûdiçe instrûttô.

Poeì fâne ûn gran ministro,
Poeì fâne ûn depûtôu
Ciû drîto che sinistro
Ciû päxe che arraggiôu.

Poeì fane ûn giornalista
Che pe question de pan
O faççe da realista
E da repûbblican.

Poeì fâne ûn chi crïe
Progresso e libertæ
Con ëse o rè de spie,
O rè di mandillæ.

Poeì fâne ûn che senza
Aveì de scarpe in pê
O fà beneficenza
Con prinçipiä da lê.

Poeì fâne ûn che privo
D’inzëgno e galateo:
Pe cöse che no scrïvo,
L’han fæto cavaggeo.

Poeì fâne quell’ommetto
Chi predica a morale
Con ëse ûn veo porchetto
Che no ghe n’è l’ûgûale.

Poeì fane ûn chi se spaccie
Artista de cartello
Con fâ de çerte faççe
Da bàttighe o martello.

Poeì fane ûn chi se stimma
Da-o peizo do pappê
Ma’n prosa comme in rimma
L’han misso in sciö candê.

E sensa tanto accatto
De spägo, færo e fî,
Fæ fä qualunque atto
A-o sesso ciù gentî.

Poeì fane chi, paolotta
E sûcca d'ûn quintale
Vorriæ passâ pe dotta
E donna liberale.

Poeì fane chi, con l'arma
Do vizio e da bellezza,
Pêu rende sciö de varma
Qualunque intrepidezza.

Evviva i marionetti
E chi l’ha fabbrichæ!
Beneiti quelli ommetti
Da lô rappresentæ!