Lunaio Regiña 1884/O suicida
| ←L'ebreo previdente | Lunaio zeneize compilao da-o sciô Regiña & C. pe l'anno bizestî 1884 de O suicida |
No→ |
| Zena, Tip.-Lit. di Fræ Paghen, stradda Luccoi , n. 52 - exemprâ conservao inta Libraja Naçionâ Centrâ de Romma |
1
Un giorno, ûn boenetto
Imberbe, patïo,
Che o paìva ûn sciûscetto
Se o tiäva o respïo,
C’ûn fosso pê masca,
Cavelli in bûrrasca,
O giäva - o regiäva
Da-e spende do Po.
2
A bælla, a speranza
Do pöveo figgiêû,
Con pöca costanza
C’ûn sascio pe chêû,
Delûso a l’aveiva
E ûn’ätro a sceglieìva
Affetto, - ciû aççætto,
Invece do sò
3
Ma cöse l’è o vïve
Delûso, reiætto?
Percöse sorvïve
A-o primmo sò affætto?
Che importa ùnn-a vitta
Coscì derelitta?
Co-a morte - se sciörte
Da tanto patî!
4
E intanto che o giäva
Do fiûmme pë sponde,
Perplesso o l’ammiâva
Quell'ægue profonde,
E o dïva; c’ûn botto,
Me caccio lì sotto
E addio — l'è finïo
Sto stento da moî!
5
Ma veddime ä galla
Bexinscio desfæto.. ..
L'è mëgio ûnn-a balla....
C'ûn colpo ben dæto,
Finiscio da forte
E trêuvo ûnn-a morte
Ciù bælla — de quella
Che l'ægua a me dà!
6
E o cöre in t’ûn bosco
Con l’arma fatâle,
O çerca o ciù fosco
Pe-o scöpo fatâle,
E a-o triste reciocco
Do crïo dell’allocco,
In bocca - o l’imbrocca...
Ma o colpo o no và.
7
Se sparo, me sciorte,
Me schitta a çervella...
Çerchemmo ûnn-a morte
Ciù blanda ciù bælla...
Che a salve e mæ forme,
E a seggie conforme
A-o fæto — ch’è stæto
Origine a-o mâ!
8
Scegliemòse quella
Da lenta asfissïa;
Pe-a morte ciù bælla
L'ho sempre sentïa...
Se piggia ûn tannon
C'ûn pö de carbon,
E senza — violenza
Se lascia scuggiä!
9
E o cöre inta stanza
Con questa sò idea,
O piggia da sanza
O n’impe a braxëa,
O tappa con cûa
Qualunque fissûa
Chè a morte — a no scïorte
Tramëzo a-o barcon.
10
Restæ dä cûccagna
Zà fæta co-e figgie,
Gh’ëa ancon de Sciampagna
Do-e bælle bottiggie;
L’amîgo o ë retîa
D’adosso ä scansia,
E o taggia - a ligaggia
Cö tîrabûsciôn.
11
Ah primma che sciorte
Da-o carcere dûo,
Benefica morte
Te dêvo ûn salûo!
Oh vitta de stento
T'è[sic] lascio contento,
I mali — mortali
M'eì[sic] metto derê!
12
Intanto o destappa
O vin de Sciampagna,
O celebra, o lappa
Che o pä ûnn-a cavagna,
Zù gôtti a derûo
Van dentro all'imbûo,
Che o tenta - ma o stenta,
De rësise in pê.
13
Coraggio che sento
Vegnî l'asfissïa
Respïo zà con stento
A testa a mæ gïa,
Me sento mancä...
Zù l'ûltima goä...
E dosso - e bordosso
O và in sciö sofà.
14
O lûmme o s’ammorta
Sä forse o carbonio...
Zà, drïto in sciä porta
O l'angëo o ô demonio,
Se pösa attendendo
L'istante tremendo!...
Fatale - letale
A nêutte a se fà...
15
De voxi indistinte...
Un lento respïo...
Poi zitto, ciù ninte,
L’è tûtto finïo!....
Oh spëgite in questa
Tragedia fûnesta
Amante, - incostante,
Tiranna di chêû!
16
Profonda, silente
A nêûtte a se passa,
Zà l’alba nascente
Da-i veddri a trapassa....
E co-e brâsse aværte
Lì pallido, inerte,
Co-a calma - da salma,
Gh[']e o povëo figgiêû!
17
Ma a saìva ûnn-a vescia
Da mæ fantaxïa?
O morto o se mescia,
O l’anscia, o respïa...
Co-i êûggi riaværti
Immobili, inçerti
O vedde — e o no credde
Che morto o non è.
18
I sensi o repiggia,
Ammiandose in gïo,
O fissa a bottiggia,
Con l'êûggio smarrïo...
O gotto co-e squâgie,
I mobili, e muâgie...
O pensa — o ripensa
O çerca ûn perchè...
19
Son morto o son vivo?
Che storia a l'è questa?
Ciù penso, n'arrïvo
A mettime in testa
Percose, s'ëo morto,
Son torna risorto
E senza — frequenza
Travaggia o polmon?
20
E senza ritardo
Seguendo st’idëa
O çerca cö sguardo
O fissa a braxëa...
E o vedde, oh locciôu!
Che lê s’ëa scordôu,
Pe-a sprescia, — ûnn-a vescia!..
D'AÇÇENDE o CARBON.