Lunaio Regiña 1884/O risotto
| ←A-o telefono | Lunaio zeneize compilao da-o sciô Regiña & C. pe l'anno bizestî 1884 de O risotto |
L'ebreo previdente→ |
| Zena, Tip.-Lit. di Fræ Paghen, stradda Luccoi , n. 52 - exemprâ conservao inta Libraja Naçionâ Centrâ de Romma |
Tûtti cantan e lôdi di raviêu
Mascima quande son fæti cö gotto
Perchè se collan tûtti zû d’ûn motto
E toccan tutte e viscere do chêu;
Ma l'eccellenza mai negä chi pêu
D'ûnn-a bella cassaola de risotto
De grann-a bella grossa e bazanotto,
Co-i fûnzi, co-a säsissa e co-i pignêu?
Invece de mangiälo co-a forçinn-a
L'assäto se ghe dà con o cûggiâ
Fintanto che no s'aggie a pansa pinn-a.
E, se n’avanza, se ne fä a frïtâ,
O quarche tomaxella, o granattinn-a:
Che sotto i denti ve sentî cantä!