Lunaio Regiña 1884/O canto de leitæe
| ←Frammento do VII canto | Lunaio zeneize compilao da-o sciô Regiña & C. pe l'anno bizestî 1884 O canto de leitæe |
E lamente de figgie→ |
| Zena, Tip.-Lit. di Fræ Paghen, stradda Luccoi , n. 52 - exemprâ conservao inta Libraja Naçionâ Centrâ de Romma |
Comme pommin de rêuza in sciä rammetta
Chi se recilla de brillä co sô,
Noî l’âzenin guiddemmo co-a trappetta
A Zëna quande spunta o primmo arbô.
E mentre che do læte i cädionetti
Fa resûnnä d’intorno l’âzenin,
Sentimmo improvvizâ di dialoghetti
Tra quelli che ne passan da vixin.
Un o ghe dîxe: ammïa che bællo bûsto!....
Anchêu a l'ha misso i väzi in sciô barcon!..
Ammïa che fianchi! che vittin de gûsto!
Te pâ ch'a segge röba de Paiscion?...
Ammïa che mento!... che bocchin da bäxi
Da dàgheli ciû dösci che l'amê!...
E da leccala comme agnellin päxi!...
Beneìto chi l’aviä pe só moggê!...
E ghe risponde l’ätro: ammïa che tresse!
Che bælle masche riönde da gaggioæ!
Se quella træsto a no se n’offendesse,
Ciû de dûxento mì ghe ne daiæ....
Ammïa che andata sôda e regagïa!...
Ammïa che bælle ceìghe in to scösä!...
Squáddrine ûn pö o profî quand’a se gïa;
E dimme s’a l’è röba da baxä!....
Lasciemmo che ne spâran zû a derrûo;
E quande i cädionetti emmo pösôu
Ne-o mentre che ghe criëmo: læte pûo!
Invece ghe vendemmo o læte æguôu...