Lunaio Regiña 1835/Debolesse
| ←O Collera | Lunaio zeneize compilao da-o sciô Regiña & C. pe l'anno 1835 de Debolesse |
I raviœu→ |
| Zena, Stampaja di Fræ Paghen, Ciaçça Nœuva n. 43 - exemprâ conservao inta Libraja Britannica |
Quello tale decantôu
Pe Animale raxunôu,
Che frà i tanti Esseri creæ
O ven dito o ciù perfetto,
Pe-a so gran fragilitae
Sempre o l’hà qualche diffetto.
Povea nostra Umanitæ!
Basta vive in Societæ
Per convinçise, che semmo
(E de ræo se n’accorzemmo!)
Un impasto d’Ambizion,
De Superbia, Presunzion,
D’Egoismo e Vanitæ.....
Povea nostra Umanitæ!
Chi di vizj no ve parlo
D’importanza conseguente,
Ma de Debolesse ciarlo,
Che se vedde giornalmente,
Cioè, diffetti, che tutti emmo,
Da-o ciù ao meno quanti semmo,
Che ne i atri descrovimmo
E in noî atri mai vedemmo,
Me ghe metto mì pe-o primmo.
Doppo questa mæ premessa
E sincera confescion,
Prego a vostra gentilessa,
Diffettoso comme son,
A sentî, se, (comme spëo)
Diggo debolmente o vëo.
Per exempio, ao Teatro andæ,
A un dappresso ve trovæ
Chi aviä adosso quæxi un secolo,
O vêu fâ amicizia subito,
E ve dà di marunsini;
(Fin-na chì se và beniscimo).
Ghe sä un Opea de ciù belle
De Roscini, o de Bellini,
Con di Attori portæ ae stelle,
No gh'è lêugo che a sentî!....
Antiquajo stravagante,
In te tutto o trêuva a dî
E ne-o Meistro, e ne-o Cantante:
Oh che muxica! (o barbotta)
A n’è ciù comme un-na votta,
Ai mæ tempi ch'a l'ëa bella!...
O ve nomina i Cappôin,
Primme Donne, Tenorôin
Meistri ranzj de capella;
Quanto ao Ballo? ohiboiboibò!
No gh’è ciù Compoxitoî
Comme l’ëa Monsù Pitrò,
E Ballaæn-ne son orroî!....
O ve porta per exempi
E Grottesche di so tempi....
Poi con grande compiaxensa,
(Ma con qualche reticensa)
O ve conta e so prodesse....
Debolesse, debolesse!
Ve trovæ in conversazion?
Lì gh’è sempre quelli tali
Che per dâse do gran ton
Dixan cose da legnâli
E da mette in to Lunajo.
Peo se vanta da conquista
Ch'o l hà fæto a primma vista
D’un oggetto immaginajo,
In virtù, o nö dixe cæo,
Ma in ta faccia ben ammiæo,
P vêu dî de so bellesse....
Debolesse! debolesse!
Lucco noto, e conosciûo
Pe-un gran palazziâ çernûo,
O no conta in serietæ
Ch’o l’hà fæto un affaron
Da guagnâ mezo mjon!
Senza tiâ fêua de dinæ?
In virtù, o nö dixe cæo,
Ma in to muro ben ammiæo,
O vêu dî da so sveltessa....
Debolessa! debolessa!
Osservæ un pö, se voeì rïe,
Cajo sempre avanti ao spegio
Con e gambe arrensenïe,
Chi no vêu vegnî mai vegio...:
Comme a scimia o fà mill’atti,
O l’hà i baffi comme i gatti,
Che o se tenze sempre e stïa
Per voeì mette a tutti puïa....
O racconta serio e dûo
(E con dâse un ton marziale)
Quell’incontro ch’o l'hà avûo....
Pe-a Sciâ tale.... cö Sciô tale...
Che o n'hà fæto tanti fasci!
In virtù, o nö dixe cæo,
Ma in to griffo ben ammiæo,
O væu[sic] dî, di so mustasci....
Debolesse! debolesse!
E Sempronio, chi o dixesse!
Che o l'aviä tanti dinæ
Comme o figgio de mæ poæ,
O no vanta e so ricchesse?
I palazzi de pappà?....
E gren ville de mammà....
E gh’azzunze a nobiltæ....
Ma dov'ælan? non si sà!
Debolessa! vanitæ!
Zitto! attenti! no scillæ!
Stæ a sentî Tizio chi leze
Un gran parto sò teatrale
Senza senso e senza sale,
Da no poeìghe affæto reze,
Declamandolo a uzo bestia
Con lodâse per modestia,
O l’aspëta che ciocchæ,
Ma no poeì, perché rumfæ,[sic]
Debolessa! prezunsion!
E quell’atro Batteston
Da Pariggi ritornôu?....
Comme i bæuli o l’hà viaggiôu,
O l’è stæto un’anno fêua,
A sò Lingua o s'è scordôu!
No sà andâ ciù all’Accasêua,
Passeggiâ per Zena a pê,
Ne o sà manco ciù salûâ!!
O fà sempre da foestê,
Ma o và sempre per fainâ!
A sentîlo discorrî
In françeize, o fà patî!
Cose o dixe de spropoxiti
Questo Scìô Monsù Ligustico!
O ve conta che a Pariggi
O l’e stæto in sciù Tamiggi!
Ch'o l’ha visto o Quirinale
Dove gh’è o Palazzo reale!
E per dive a polytecnica
O ve dixea schêua politica!...
O decanta a fedeltæ
De Madamme abbandonæ
Che creppian tutte (g’han dito)
Se o no torna lasciù fito!...
Debolessa! vanitæ!
(Per dî megio, azenitæ!)
E quell’atro Sciô Tiburzio,
Superbiscimo ignorante,
Ghe pâ d’ëse Quinto Curzio,
Pigmeo fà da gigante,
O v’ammîa con arroganza!
Se dà un’aja d’importanza
Spantegando protezion!
Meschin noi! senza de lê
Chi o sosten, cazzieiva o Çê!...
Compatîlo sto mincion,
Che con tutti i so dinæ
O g’hà incangio de çervello
Un ballon de vanitæ!....
Debolesse! andemmo ao bello.
Dæ un pö mente ä Sciâ Pimpetta
Zà sei votte madonava?
A fà sempre a pupponetta!
Và in giandon pezo che l’ava,
No gh’è modda ch'a no piggie!
Domandæghe da so etæ?
A l’hà meno che e sò figgie!...
Dcbolessa! vanitæ!
E quell’atra inspiritâ,
Meschinetta! chi se sciata
Per voeì fâ da letterata?
In te tutto a vêu dettâ,
A no parla che italian,
A l'hà sempre un libbro in man,
(Che ben spesso o l’è ä reversa),
Gran nemiga de l’Istoja,
Do Romanticismo persa,
Don Chisciotte a sà a memoja;
A l'è tutta sentimento,
Fin ne-a roba!... che talento!
E quell’atra compitiscima
E braviscima person-na
A se rende schivatiscima
Pe ëse troppo ciacciaron-na,
D’assettâ, d’in letto, e in pê
A vêu sempre parlâ lê,
A se fà botta e risposta,
A pâ proprio fæta apposta
(Ahimè m!) con quello timpano
De voxassa chi pâ un organo
Pè insordî l’umanitæ,
Debolessa! vanîtæ!
Oh de quante qualitæ
De diffetti mai se dan
Maliziosi, o trascuræ!
Martin bæ in stradda incontræ,
O ve ciamma dä lontan,
E per fâve un-na finezza
O ve strenze tanto a man
Ch’o ve-a strêuppia!... debolessa,
Ma fràtanto giastemmæ.
Meschin voî poi se intoppæ
O gran notiziê Grighêu,
Bezêugniä che ve-o sciughæ...
O l’è un bravo e bon figgiêu,
Ma o l’hà o vizio da Politica;
Quando mangia lê politica,
Dorme, e parla de Politica,
Tutti i fêuggi leze e critica,
Vedde e cose ä so manêa,
Mille vesce o dà da intende,
E con spuâvele in ta cêa
De persuâdive o pretende,
Nè o vêu manco che parlæ!...
Debolessa! vanitæ!...
E quell’atro gran soffista
E famoso proggettista,
Seì feliçi se o schivæ!...
Ma o v’afferma, e per parlâve
O ve dà tanti spunciôin
Che in t’un canto o và a bloccâve
Con discorsi senza fin;
O ve leva o pelûcchetto,
Ve despunta o gipponetto,
Ve desgruppa o mandiletto,
E o ve stà tanto d’arrente
Cö sò fiato chi è fetente
Che per non restâ impestæ
Taggiæ curto, e ve n’andæ,
Ma o n’acciappa presto un atro.
Aoa andemmo torna ao Teatro;
Osservæ quella Scignôa
Tutta missa in punto d’ôa
C’un röbin de sæa punsò
Assettâ ne-e careghette;
Due davanti a se ne mette
Per posâghe o saccanò;
A ciccioezza smorfiezzando
Con Madamma so vexin-na
Chi hà un’enorme capellin-na,
Tutte due sempre occezzando
Un’imberbe Narcisetto
Instecchìo tutto appuntôu,
(Ch’ o pâ un pälo veo ciantôu),
Chi e stà a miâ con l’occialetto,
Grecisandose i cavelli
C’un-na man farsïa d’annelli;
Rondezzando, i pê strisciando,
Tutte amiando e vagghezzando,
E cantando comme ao Teatro....
Ma s’è in Giexa!!! no dìgg’atro,
Anzi scappo de galoppo,
Che se staggo, diggo troppo,
Vaddo fêua do semenôu!.......
Perdonnæ i tanti diffetti
In sto mæ struffuggio letti,
E scuzæ se v’hò tediôu,
E per consolâve o coêu
Vortæ a carta, gh’è i Raviêu!