Lunaio Regiña 1835/A borsa
| ←Campagnata | Lunaio zeneize compilao da-o sciô Regiña & C. pe l'anno 1835 de A borsa |
Avizo a-e mamè→ |
| Zena, Stampaja di Fræ Paghen, Ciaçça Nœuva n. 43 - exemprâ conservao inta Libraja Britannica |
Doppo tanti abellimenti,
Fabbricati, Ingrandimenti,
Teatro, Ciasse, Stradde cian-ne
E l’Exilio de Grondan-ne,
Un Locale a Zena manca
De lê degno per fâ a Banca;
Perchè (a dîla in confidenza)
A l’è proprio un’indecenza
Che un-na Zena! un-na Çittæ
Con raxon ciammâ superba
Pe-i Palazzi, e i so dinæ,
Tegne a Borsa (oh cecitæ!)
In to mezo ae Gaggie e a l’Erba,
E in t’un canto d’un-na Ciassa
Dove tutto o mondo passa,
Insordij dai Ciarlatten,
Addentæ da mosche e chen,
Investij, spunciæ, buttæ
Dai Camalli (e giastemmæ!)
Profumæ dai Zigaristi,
Disturbæ dai Novellisti,
Assediæ dä povea gente,
E allumæ da....che bezêugna
Ao mandillo dâse mente,
O taxeì!... Ma che vergêugna[sic]
Pe-i Banchieri e pe-i Sensæ
De stâ lì a moddo de zetto,
Aspresciæ, ammuggiæ, a macchetto
Comme tanti Pesci sæ!
A ægua, vento, bratta, pûa,
A bruxâ da-o Cado ä Stæ,
E d’Inverno a zeâ, e a piggiâse
Un malanno, un-na puntûa,
Senza lêugo d’assustâse,
E per cose?... perchè manca
Un Locale per fâ a Banca!...
Cose diggo?... vegno scemmo
In veitæ, e no me n’accorzo!..
E o Locale no ghe l’emmo?
No gh’è a Sala de San Zorzo?
Se pêu dâ Vaso ciù bello,
Ciù magnifico de quello?
Dov'o l’è un atro Locale
In Europa a questo eguale?
Fæto apposta per fâ a Banca,
Manco o nomme no ghe manca,
Che ab initio o l hà con lê,
Perchè o l’è a famosa Banca
Chi batteiva do Pappê
Che o l'andava ciù che i Scui!
Fabbricato rinomôu
Pe-i Tezöi che g’han versôu,
Dove stavan ciù segûi!
Sala vasta decorâ
Da-e gren Statue de quelli Ommi
Poæ da Patria, degni, sommi
Che g’han speizo o so dinâ
Per fâ andâ a forza d’argento
Questo gran Stabilimento!
Perchè dunque no gh'andâ
A fâ i cangi co-i so comodi?
Senza stâli in stradda a fâ,
Sempre esposti a mille incomodi!
Oh vergéugna![sic] oh cecitæ
Pe-i Mercanti e pe-i Sensæ!
Se a no fusse testardaggine,
A ciammieivo balordaggine,
Coæ de perde a sanitæ,
Travaggiâ a scarso pe-i Meghi,
Per fâ mette a Cotta ai Ceghi!
Basta, vêuggio ben sperâ
Che pensando seriamente
Ao pericolo evidente
D’ammaotîse e de creppâ,
Andian tutti in generale
(Senza fâse ciù pregâ)
In te questo gran Locale,
Che de veddïo zà me pâ
Per Sovrana Autoritæ
Solo ä Borsa destinôu,
Devolûo e dedicôu,
Grazie ä grande attivitæ,
Passi fæti, zelo e impegno
D'un Banchiere nostro degno,
Che aoa chì no nominiö,
Ma che sempre ringraziö.