Lûnäio zeneize 1932/Prefazion
| ←Presentazion | Lûnäio zeneize pe l'Anno bisesto 1932 de Prefazion |
Revista→ |
“ Mûsa antiga de Portöia
damme ûn pô o tò chittarrin „
che onorâ vœuggio a memöia
do mæ Meistro, o Sciô Martin:
no sò ben se ghe riusciô,
ma fô quello che porriô.
Di gren anni n'è passôu
da allantöa, ma sempre in chœu
e sò foëtte m'è arrestôu
che lezzeivo da figgiœu,
e aöa, chi, sensa preteise,
tento scrive in bon zeneize.
Me scûsiei se parlo ciæo,
sensa tanti complimenti
da genuino “ a riso ræo „.
Spero, poi saieì contenti,
se in memöia do Reginn-a
bûttiô zù quarche sestinn-a.
Ma se invece de mez'öa
de resciöu ve désse tedio,
miæ che ho scrito pe demöa
e che a tûtto gh'è remedio:
Serræ o libbro e andæ a dormî,
ma..... a i amixi no ghe o dî.
ORE LEO
Fiori cangianti
Spero però che quande l'avieì letto
ne restieì soddisfaeti tutti quanti.