Lûnäio zeneize 1932/O neutrale
| ←Insemme in vitta e in morte | Lûnäio zeneize pe l'Anno bisesto 1932 de O neutrale |
Scignorinn-a moderna→ |
O NEUTRALE
Tra e belle föe che a nonna a me contava
ûnn-a a se intitolava
« L'äse de Burridan »,
che o s'ëa cacciôu in ta testa
de fäse mantegnî solo che a pan,
quæxi che tûtti i giorni foïse festa.
Pe ûn pô a l'è andæta ben
che de riffe o de raffe o l'ha spuntâ,
ma quande o prinçipâ
o g'ha misso davanti paggia e fen
lê muscio, o no saveiva
a quæ dâ a preferensa
perchè nè ûnn-a nè l'ätro ghe piaxeiva;
scicchè, pe conseguensa,
mangio?... no mangio ?... co-a sò indecision
o l'è creppôu da-a famme,
secco, manco ciù bon
pe fâ, insemme co-o porco, do salamme.
E questa föa che m'han contôu, figgiœu,
a me fà vegnî in chœu
ûn cäxo assæ piccante
che è successo a ûn cantante
da Cappella Scistinn-a,
a-o quæ ûnn-a scignorinn-a,
(o sò stato ignorando)
a domandò, schersando,
se o no intendeiva de piggiâ moggê.
E, pe savèi se a lê,
(che a l'ëa ûnn-a bella brûnn-a)
ghe sæ toccôu a fortûnn-a,
continuando a ghe disse a brûxapeì
se e donne o-e preferiva neigre o bionde.
— Mi no o sò dî davveì,
a s'è sentïa risponde,
bionda o neìgra per mì a donna a l'è uguale,
perchè... perchè... perchè, mi... son neutrale!