Lûnäio zeneize 1932/A grigöa e o scorpiòn
| ←Pater nostro | Lûnäio zeneize pe l'Anno bisesto 1932 de A grigöa e o scorpiòn |
O ratto emancipôu→ |
Föe
A grigöa e o scorpión
Unn-a grigöa che a stava a piggiâ o sô
a se sciallava in to sciaccâ de l'œuggio
a döî griguotti, che, pe fâ l'amô,
ghe giävan tûtto in gio, in sce o stesso schœuggio,
sensa vedde ûn figgiœu che lì vixin
o l'allungava o brasso cian cianin.
Solo quando o g'ha misso a man addosso
pe acciapäla,... coscì pe ûnn-a demöa,
lê lesta, lesta a l'è sâtâ in te ûn fosso
e, pe fâ fito, a g'ha mollôu a cöa
lasciandolo co-a bocca spalancâ
pe-a mäveggia de veddila mesciâ.
Drento in to fòsso a l'ha attrovôu ûn scorpiòn,
che credendo de poëila consolâ,
o ghe disse: « mi no ëa coscì minciòn
da perde a cöa, ghe aviæ vosciûo insegnâ
o rispetto a 'sto brûtto mâdûcôu
l'addentavo e... o l'ea « bello avvelenôu ».
« Bella soddisfazion, — lê a ghe rispose —
de castigâ ûn figgiœu sensa giûdizio,
a mi no m'han mostrôu de fâ 'ste cöse,
a vendetta, mæ cäo, a l'è ûn brûtto vizio:
con l'esempio e l'amô solo se pœu
insegnâ a trattâ ben, fin da figgiœu ».