L'allegria de Gioxeppe e Baciccia
| ←torna a-i atre sciortie | L'allegria de Gioxeppe e Baciccia pe-a gran sciortia de S. Giacomo de Foxinne ai 29 de Settembre 1823. |
| Exemprâ conservao inta Libraja Naçionâ de França, da-a coleçion do Paul Ristelhuber (1834-1899). O Gioxeppe e o Baciccia doveivan ese doi vegi cazassanti de 'na quarche nominata. Da-o contegnuo pâ d'acapî che-o primmo o foise morto cazendo inte 'na cantiña. A procescion pe-o çentanâ a fu postiçipâ a-o 4 d'ottobre pe via do tempo grammo. (G. Musso) |
L’ALLEGRIA
DE GIOXEPPE E BACICCIA
PE-A GRAN SCIORTIA
DE S. GIACOMO DE FOXINNE
Ai 29 de Settembre 1823.
Canson.
ZENA, Stampaja Pagan, Ciassa Nêuva, N.° 43.
Sciù, stæ allegri, cai Fradelli,
Destrighæve, cose fæ?
L’ê vegnûo perscin-na î morti,
Ch'ên a Foxe assotteræ,
Pe' sto giorno de gran sciallo,
De gran festa e de piaxei,
E pe restâ mävegiæ
De grandezze de Foxin-ne,
E de voî San Giacomin,
Che fra tutti aoa brillæ,
Che sei lì, e pä che parlæ,
In to mezo di nemixi,
E voî intanto ve ne riei,
E o cavallo tanto ardìo,
Che pä giusto che infuriôu
O se i sbranne in t’un asbrio.
Ma aoa mi donde m'avanzo?
L’ê impossibile o poei dî
Cose han fæto de grandezze,
Roba proprio da stordî.
Ma.... chi veddo?... Fræ Gioxeppe,
Cao amigo, cose fæ?
Sei voi asci di nostri Fræ?
Sei che o son, e son di antighi,
Di robusti e forselûi,
E quantunque segge stæto
Pe’ quarch’anno in lêughi scûi
A sentî cantâ e bugaixe,
Aoa poi crescendo a forza,
Pe vegnî a vedde e Foxin-ne,
Hò piggiôu torna a mæ scorza
Inguggieito in t’un robon
Struffugiôu, ma bello e bon,
E cacciando fêua un crio
De lazù so’ un pö sciortìo;
Finalmente so’ arrivôu
A poeî vedde i mæ Fradelli,
Che un pö ciù perdingolin-na!
Torno a cazze in ta cantin-na,
E no gh’ea ciù remiscion;
Ma lasciemmo sti discorsi,
Perchè torna a-o mondo son.
Bella cosa in mæ davvei,
Bella cosa, cao Baciccia,
Esse vivi pe poeî vedde
Cose n’ea mai ciù da credde,
Nì o se poeiva immaginâ;
E d'intanto che ghe penso
Mi me sento recillâ.
Ma miæ un pö quante mai gente?
Che invexendo! che romei!
Cao Gioxeppe, scì a l'ê vea,
Che ne sciorte d’ogni canto,
E da-e case, e da-e ciassette:
Oh che festa! oh che allegria!
Viva o MOU! e per lê intanto
Gh’a d’andâ scînna e tassette.
Sentî i sbraggi di gardetti,
Vegnî in sciù pe-i caruggetti:
Viva Giacomo o Maggiô,
De Foxin-ne eterno onô!
Viva! viva! cao fradello,
Sento quæxi o mæ çervello
Andâ in estexi contento
De poeî vedde sto portento.
De grandezza e de maestæ.
I Foestê in gran quantitæ
Son vegnûi ben da ogni canto,
Perchè n’han mai visto tanto,
E anche lô con allegria
Dixan viva a gran Sciortìa!
Ma zà a folla a ven ciù pin-na,
L'invexendo o s’avvixin-na:
Ecco chì sponta o Confôu:
Quante torcie l'ha d’intorno!
Comme o lûxe comme o spicca!
Comme o fà brillâ ciù megio
De San Giacomo a figûa,
Ch’a pä viva, e l'ê in pittûa!
Miæ che fiocchi! che öu! che argento!
O ghe pä schizzôu a stento:
Stæ a sentî che scinfonia
De violin, e de trombette:
Clarinetti! Oh che armonia!
Che soavi ritornelli!
Se savesci, cao mæ Fræ,
Da-o contento aoa moiæ.
Con che passo e che maestæ
Ven avanti i Pastorali!
Senza mette a man a-i êuggi
L’è impossibile l’amiali.
Da-e ricchezze ch’han d’attorno,
E dall’öu e dall’argento
Pän doi soî de mezogiorno.
Amiæ un pö San Giacomin,
Miæ che bello gardettin!
Che vestiajo! che ornamenti!
Pin de raggi tutt’in gio;
Che cavallo ben finio!
Ghe fan corte i Pellegrin,
C’un'immensitæ de suin:
Miæ lô ascì: che vestimenti!
Che recammi! miæ che arselle!
Adreitûa pän tante stelle.
Quante Croxe, cao Gioxeppe!
Presto presto allarghæ i êuggi;
Mi i hò averti che pän bêuggi:
Che splendô! che nêuve cose!
Che travaggi raffinæ!
Quante torcie! che spavento!
Che van zù sciccome l'ægua,
E fan fito comme o vento.
Ven i Fræ de Compagnie
Con tant’atre scinfonie,
Che pän tanti Pastorali.
Ghe figûa! comme stan ben!
No se pêu manco fissâli.
Con recammo relevôu,
Assæ degno d'esse amiôu,
L'öu, l'argento o ghe pä a nöu,
Zitto, zitto, l'ê chì o MOU.
Amiæ un pö, se poei, sott’êuggio,
Quante gioje! che diamanti!
Che tezoi! miæ un pô che canti!
Quante raggi! m’inorbiscian.
Sentî un pö questo conçerto,
Che so’ i megio professôi;
Sentî un pö che ritornelli,
Che fan stâ allegri i fradelli!
Ecco chì che ven a Cascia,
Che de lûmmi a n’ha un subisso.
Miæ che statue! pä che parlan,
E son fæte tanto ad arte,
Che o cavallo pä ch’o parte.
Viva o MOU! e viva i Fræ!
Cose han fæto con onô
De mäveggia e de stûpô
Ma anco un pö mi vêuggio andâ
Fin che posso ä Cascia unìo,
Mi ve lascio, amigo, addio.