Giurian Rosso Mss 17720/Serenadda
| ←Ro viagio de Venexa | E poexie do Giurian Rosso in lengoa portoliaña e zeneize de Serenadda fæta da 'n amante de nœutte tempo a ra so Galante |
A ro sciô Girœummo Spinnora→ |
Serenadda fatta da un amante di notte tempo alla sua Galante
1.
Perche voi sei rà me speranza cara
O' dell'annima mè vitta, e sostegno
Per nõ poeive montà rà vostra scara
Così d'in ciassa à visità ve vegno.
Nò voeggiè ve ne prego esseme avara
D'unna mezz'hora sola de trattegno
Per fin, che posse dive à rà Zeneize
Dò trè raxoin perche sen miegio inteize.
2.
Sò ben che savei ben rà lengua tosca
Perche sei savia, spiritosa e accorta
Se ben ciù storbia, e da capì ciù fosca
A ve ven d'onde seì fin da stà porta;
Mà à mì me sata à divera uña mosca
De serta ambition chì nò comporta
Per voì, per ì vexin per chi ghe passa,
Che imprende versi per cantà in Ciassa.
3.
Se cantasse un toscan quarche la<m>enti
Crereiva ogn'un che foissan stantie trete
D'intr'un libero in stampa, ò veram<ente>
Da un'atro, ò per mì da un'atro fete:
Usanza de cuoè finti, anzi da fuoenti
A' chi rà bocca ancon ghe sà de lete
Che voeggian fà drò musico e nò spende
Ciù per fasse sentì, che fasse intende.
4.
Mi vegno chì da voi che sei rò Miego
Con ro pieto inciagoù l'añima affrita
Per dì in Zeneize, e nò in latin ne in grego
Quelle raxoin, che vero amò m'indita
Feve per tanto à rò barcon ve prego
Finche rà mè passion v'aggie descrita;
Ese troppo domando appeña arviro
Tanto che gh'intre quarche me sospiro.
5.
Per voì mie cuoe de così boña pasta
M'hà reiso amò, m'hà genoroù me muere
Che questa gratia minima me basta
Che arvì tanto barcon, che gh'intre l'ere
Rò barcon, ch'à rò scioù rà via contrasta
Fè ch'ò non seè serroù, mà ch'ò rò puere
Pù che voi me sentì finche ciarlatte
D'ogni poca fissura n'hò da sbatte.
6.
Mà se ben stè de drento pè rà gente
Sò che m'udì, sò che nnon sei sì crua
Che inteiso, che mì son chi da rà rente
Per sentime cantà non sei vegnua
Parlerò donca à voi come presente
Però vittinna d'oro se seì nua
Perche tira stà noette un pò de bixa
Metteive un'ongaresca, ò una camixa.
7.
A' stave à dì che mì ve serve, e v'ame,
E che foego d'amò per voì me bruxe
E che mieggio parei frà i atre Damme
Che frà rì Senatuoì nõ pà rò Duxe
L'è un dì, che bruxe, un fì, che seè intre sciamme
E che ciù, che rè stelle rò Sè luxe
Se v'amo, e se ve servo à ciù me puoeì
Rò sò mì, rò sà amò, voì rò saveì.
8.
Rò saveì ben, mà demostrè, ch'è pezo
Questa mè servitù de nò saveira
Si me fè deslenguà, com'intrò mezo
Fareiva d'un farò motto de seira;
Però de sofferì, perziò m'elezo
Pù come rocca de vorreì rà teira
Per veì se con patì, senz'arvì bocca
Un dù quarche pietè rò cuoè ve tocca.
9.
Quando passo de chi, che l'è de giorno
E che rà mè fortuña favoreive
Fà che ve veggo (se ben curlo intorno
Spesso trè vote assè prima che veive)
Non gh'è nisciun da puoe pè rò contorno
Che maraveggia, e penna nõ reseive
De veime così affrito, e mar'andeto
Pè rà cattiva ciera, che m'hai feto.
10.
Sospirando ve miro, e con bon terme
De fave reverenza hò per usanza
Voì per non spemesave à marasperme
Chinè così rà testa per usanza
Non diggo, che digghè, che mì me ferme
Ne che scandalizè rà vexinanza
Mà vorreiva un risetto, e un chinà d'oeggi
Chi dixesse hò per ben, che ben me voeggi
11.
Nò se desdixe miga à re garzonne
Sen pù quango se voeggiè oneste, e schive
D'aveì rò sò galante, e rè personne
San ben, che senza amò Donna nõ vive;
Anzi quando nò ven ch'o ghe raxonne
Pensan, ch'ò seè d'accordio, e ch'o ghe scrive
Perche non s'ama, chi l'amò nõ cura
E senza premio servitù non dura.
12.
Sè l'amò, che ve porto, e rò respetto
Per aveì rò mè mà sempre taxuo
Se drò bon, se drò fin, se dò perfetto
E rà merzè, che n'hò fin aora avuo
Diro voi, che l'hei visto, e s'in effetto
D'atro moè m'hai pagoù, che d'un saruo,
Rò quà per vostra usanza, e me desgratia
D'aveì come vorreiva n'hò moe gratia.
13.
Se me neghè un favò de questa sorte
Se à tanti prieghi nõ ve seì devotta;
Mì morrò ben se sà, mà rà me morte
Ve metterà ancon mà ciù d'uña votta
Che dall'esempio mè rè gente accorte
Schiveran de servive perche in notta
Sareì drà ciù superbia, e ciù villanna
Che moè creasse rà natura umaña.
14.
Tutte queste raxoin schiette, e sincere
Che mi v'hò dito in ciù de dexe ottave
Così vorresse amò come son vere
Che avessan d'intro cuoè forza d'intrave
Che per esse demesteghe, e leggiere
Se me faran pareì Poeta da Rave,
Me basta, che seè bon ciù che à compoñe
A fame vorreì ben da rè garzonne.
15.
Mà come affettion rè partorisca
Così senz'arte ve rè porto tutte
Bezuoegna che s'indore, e che se lisce
Quelle teè cose che son fase, e brutte
Rà veritè chì è bella nò patisce
Che corò rà depense, arte l'aggiutte
Siccome nò hà mestè drà camerera,
Ne men drè lode mè rà vostra ciera.
16.
Rì confetti amorosi, e rì fioretti
aposta hò tralascioù perche m'accorso
Che son fore da Fuoenti, e Moffietti
Che rì solan cantà per fà dro Zorso
Versi come rò cuoe semplisi, e scietti
Anzi non versi, mà raxoin ve porso
Perche servan per miezo, e per aggiutto
A' fà voì tutto mè, mì vostro tutto.
17.
E perdonéme, e compatime in tanto
se v'hò tegnuo lasciù troppo in dexaxo
E se troppo è duroù questo me Canto
Tornè à posà, che me ne vaggo, e taxo
Così poè, che rà bocca nõ pò tanto
Con questo scioù rà bella man ve baxo
Adio me cuoe, care mè stelle adio
A reveise de dì ch'aora hò finio.