Due brocche de viovetta/Mosche gianche
| ←Ninn-a Nann-a | Due brocche de viovetta de Mosche gianche |
Brrr... che freido!→ |
| ed. www.liberliber.it 2010 |
Comme l'é bello stâsene
tappæ in t'ùn salottin,
a quattr'êuggi, scädandose
a-o fêugo do cammin,
e sentî solo a pendola
e i chêu che fan tic-tac,
e a caffettëa chi brontola
pe-o puncetto a-o cognac,
mentre, de fêua, co-a raffega
arraggiâ comme ûn can,
sciù e zù, zù e sciù, cinciandose
e mosche gianche van,
scorrindose, pösandose
chì e là, ûn pö dappertûtto....
ma scì, ma scì, convegnine,
l'é bello o tempo brûtto:
Vedde ingianchî in t'ûn attimo
a stradda, l'orto, i teiti,
i erboi che pan fantaximi
in ti lensêu ingûggeiti,
sentî che adaxo, adaxo,
s'ammorta o passo zù
pe-a stradda, – dâse ûn baxo,
e no çercâ de ciù:
lascia che i penscei loveghi
se ne vaddan despersci,
sfêuggiâ do Praga e pagine,
lëze quelli sò versci
coscì cai, coscì semplici
e coscì pin d'amô...
"basta ëse in duî, poi, rîtene:
a neive a l'é ûnn-a sciô".