Due brocche de viovetta/Goççe de sangue
| ←Pe-o X Marso | Due brocche de viovetta de Goççe de sangue |
Giornæ de sô→ |
| ed. www.liberliber.it 2010 |
– Ma cöse l'é che vêuan?
perché a cria sta marmaggia?
nascian, stentan, e mêuan:
ghe n'é assæ pe-a canaggia.
Cöse?... diritti?... in Rûscia?...
en matti da ligâ:
no! no! no! – barbasciûscia!...
manco stâne a parlâ. –
Nicolla, a n'é a manëa
da raxonâla anchêu:
senti: – monta a marea:
ommi, donne, figgiêu
n'en ciù comme ûnn-a votta:
ti ti creddeivi ancon
de fâ ballâ a marmotta?
ah, va là…… demoelon!
Täxi e söfri, – ä fin ven
che se n'ha pin e c....ge;
e l'é zà bell'e ben
ch'a bogge, a bogge, a bogge....
l'ægua boggindo forte
a caccia sciù i coverci,
e o vin.... o vin o sciorte
dammëzo a-e döghe e a-i çerci.
Söfri e täxi; – a cadenn-a
rebella, – porzi a faccia
a-o scciaffo, – doggia a schenn-a, –
baxa a man chi minaccia
cö naigaka e o staffî, –
cûrvite in ta miseia,
e seggi pronto a moî,
se vêuan, lazzù, in Scibeja,
rinunzia ä dignitæ
anchêu, doman e doppo,
ven che poi se n'ha assæ,
e che se cria: – l'é troppo!
l'é troppo, e basta! – Monta
ûn maoxo d'odio a-o chêu,
e.... Morti chi ve conta?....
ommi…. donne.... figgiêu.....
L'é freido, fiocca, fiocca....
pinn-a de macce rosse
l'é a neive gianca e sciocca:
Nicolla, quelle goççe
no van ciù via, no van
no van ciù via: – coscì
a e aveìva in sciä man
a tragica Lady.
Quante son?.... dexe ?.... çento?....
son mille ?.... dexemia?....
ma o scingûlto, o lamento,
a smorfia de chi spia,
e de chi vive ancon
a lägrima, o sospïo
serræ in t'ûnn-a canson,
o manda Gorki in gïo.
Gorki poeta da steppa,
da santa ribellion...
Co-a corte ah! no se treppa;
lê a soffoca a canson:
Scî? ti ti voeivi fottine?
– dixan – ti no ne sciorti;
sciù, grandûcchi, mandænelo
vivo ä "casa di morti".