Donaver Antologia 1910/O mainâ de partenza
| ←torna a lista di atri scriti | O mainâ de partenza de da l'Antologia do Donaver do 1910 |
torna a l'endexo→ |
1
Parto, addio mâe ben diletto,
Me ne vaggo a navegâ:
E’n sce l’erboo de trinchetto
Te salûo d’in mezo a- mâ!
2
Veddo i monti da mâe Zena,
Veddo i âegue, veddo o çê,
Che de giorno in bâella scena
Un festin forman de lê.
3
Mentre scrêuvo a mâe casetta
Donde sbattan i lensêu
Penso sempre a-a mâe Ninnetta
E me spaxima o mâe chêu.
4
A Lanterna da-i mâe êuggi
Quande veggo scomparï
Mi me pä tra quelli schêuggi
A mâe Ninna de senti.
5
In to mâeximo momento
Forse, forse lê a preghiâ
Che ritorne a sarvamento
Da-i pericoli do mâ.
6
Scomparindo da-a sò vista
Questo legno sospirôu
Comm’a cianze e lê a s’attrista
Che me segge allontanôu!
7
Ciù rischiôzo e pin de stenti
No se dà do mâe mestè,
No sentï sciusciä che venti,
No veddei che âegua e çê.
8
Con o mâ comme e montagne
Gremenïo tûtto d’öchin,
Cö pericolo a-e carcagne
Mi me trêuvo ogni pittin;
9
Ma pensando a-a mâe Ninnetta
Con franchessa sfiddo o mâ
E me pä d’ëse in barchetta
Con lê sola a barchezzâ.
10
In sce l’arba da mattinn-a
Quand’appenn-a spunta o sô,
Cö sò canto a rondaninn-a
A me parla do mâe amô.
11
A me dixe: «Un bell’angiëto
A tò Ninna a t’ha appâegioû,
E a l’alleita cö sò pëto
Che d’avolio o l’è formoû.
12
Lê de brûn tûtta vestia,
Con a robba a pittettin
Ciû pietosa a l’ha l’ammïa,
Ciù scîmpatico o faccin.
13
A l’insegna a-o sò tezôu
O tò nomme barbottä
E a ghe dixe: « Mottin d’ôu,
Vegni un giorno bon mainâ».
14
Quande poi ritorno in porto
D’in scia punta là do Mêu
A mâe Ninna con trasporto
A me mostra o sò figgiêu.
15
E sätando zù dabbasso
A lö incontro pe vegnï
Mi me i baxo e me l’abbrasso
Cö scingûlto tûtti dui.