Dialogo do Leituga con meistro Tacco, e o sciô Trenetta
| ←torna a-i atre sciortie | Dialogo do Leituga con meistro Tacco, e o sciô Trenetta - Martellien de |
| exemprâ conservao presso a Libraja Naçionâ de França |
Do Leituga con Meistro Tacco, e o Sciô Trenetta.
M. T. Leituga, presto presto; corrimmo zù pe Prê,
Che anchêu da-o grande sciato preçipita o Quartê.
Leit. Cose ti m’imbarlughi? ... no poscio camminâ;
Va ti, se ti n’æ vêuggia, mi lascime quëtâ.
Ti sæ, che i garçonetti, vedendome in Çittæ,
Me tian di becchelletti, de bughe, de strunxæ;
Ti æ vêuggia....
M. T. Taxi, scemmo! pe andâse a divertî,
Me sottoscrivo o collo, se mêue, se s’ha da moî.
Ti sæ, che ti n’è solo pe fâte mincionnâ,
Che mi ghe n’ho a mæ parte, che son canna provâ:
Che subito che arrivo, che spunto là pe Prê,
Me pâ sentî i gardetti; dæghia, che o l’è chi lê;
Presto, gh’è Meistro Tacco, tiemmoghe de bughæ,
Demmoghe un-na baccicola, mettemolo a sascæ.
E scì .... (grattandosi)
Leit. Basta; t’ho inteizo; veamente ti è un ommin,
Che ghe n’è pochi a Zena.....
M. T. Taxi là, biricchin,
Ti co-a tò gamba soppa, ti orriesci cogionâ.
E poi ti n’è bon atro, che a beive, e a giastemâ:
Ma intanto che noî atri giappemmo o tempo passa,
Vegni....
Leit. Ma donde, Tacco?
M. T. Vegni... a vedde a Cazassa.
Leit. Ti careghi, o ti burli?
M. T. In mè zuamento no:
Ma tæ! ... te chi o Trenetta; nint’atro mi no sò.
Tren. (che viene piano sorridendo) Poli... t, o to, polito, amixi ve salûo,
Ti è in so ...d, i di, ti è in sôdi, Tacco, ti è sostegnûo.
(ironico)
M. T. Scuzæme, Sciô Trenetta; seì giusto accapitôu
A dâla a intende megio a questo abbarlugôu.
Tren. Va be... n, e ne, va bene. (come sopra)
M. T. Latin no me parlæ,
Se trattâ d’un-na cosa de tutta serietæ.
Tren. Va be... n, e ne, va bene. (come sopra)
M. T. Evviva! vêuggio dî;
Leziemo un’atra votta; ve prego a stâ sentî.
Tren. Va be... n, e ne, va bene.
M. T. E tocca! e dai! va bene,
Seì cose o Bödisson dixe; che non conviene.
Dunque parlemmo södo; vorrieiva, che me disci,
Cose l'è à Prê doman, che se fà tanti sbisci?
Tren. Me ven da ri... e, da rie; e comme dai lumetti,
Pe-i porteghi, pe-e stradde, dai furgai, da-i sc-ciuppetti,
Da-o grande tremelêujo, che fan per o Quartê,
Non seì che doman, sciorte S. Giacomo de Prê?
E cöse, caspitinna! e zêuggia, e vei, e anchêu,
Cös'eì sentïo pe-e stradde sbraggiâ da-i decrettêu?
Me scapollæ, camiadde?.. poli... t, o to, polito! (ridendo)
Tacco (a Leit.) Ti veddi, brutto rango, no te l'aveiva dito?...
Leit. Per bacco! ti è un gran ommo! e mi da moccalûmme
Pensava i Cazassanti fîsan andæti in fûmme:
Saveiva pe-a miseja, che aveivan impegnæ
E Canti, e Croxi, e Cristo, a Cascia co-i Fanæ;
Ma aoa, che sento questo, ve prego a voeime dî,
Cöse fan mai de bello, de röba da stordî?
Tren. Sûbito: ma pianino, bezêugna che ve pette,
Vaggo da-o Sciô Regin-na a vendighe ë cäçette;
Frattanto de regallo me fö dâ un-na Canson,
Vedre . . . t, e te, vedrete, che sciâto, che fogon!
Se fîse o me a negasse, cöro da-o Sciô G. C.,
Lì pe menûo gh’è tutto quello, che fan pe Prê,
Da terza no ne parlo; n’han dito ira de Dio;
Camiadde, in t’ûn momento a rivedersi. Addio.
(parte piano piano sorridendo.)
Tacco Ti senti, rango infame, l’è vëo quello, che ho dito?
Leit. Tacco derruôu, te creddo; presto corrimmo, fito;
Quello, che ha da succede, n’importa, succediâ,
Me sento a gamba rana dä forza ellettrizzâ.
Vêuggio ancon vedde questa.. . per tutto zù, corrimmo,
Vegnime apprêuvo, andemmo, mi cöro per o primmo.
Sciû presto, no tardemmo...
M. T. Silenzio, tanta fuga,
No gh[']e poi de bezêugno; poemmo aspëtâ, Leïtuga.
Leit. Ma primma . . .
M. T. Mi dixeiva pe andâse antiçipâ,
Perchè con ti pensava ghe vöese un-na giornâ.
Ma sento, che ti dixi, ti væ comme sajetta,
Vorrieivo prima andescimo a beine un-na mezzetta.
Leit. Chi paga?
M. T. Vegni; un quadro m’han dæto da exitâ, (ridendo)
Leituga, ti m’intaggi?
Leit. Ova; se pote andâ.
Mi son ciummin, ciummin, sibbri comme o papê,
Andemmo primma a beie, corrimmo doppo a Prê.
Evviva i Cazassanti!
M. T. Fracasso aoa no femmo,
Se ti eû vegnì[sic], caminna ...
Leit. Viva a Cazassa! Andemmo.
ZENA, Stampæia Pagan (Con permiscion.)