De Franchi Comeddie 1781/Ra locandera de Sampê d'Areña/19
| ←Scena XVIII | Ra locandera de Sampê d'Areña de Scena XIX |
Scena XX→ |
| a m co-a tirde a l'é stæta reiza co-a doggia m (mm) |
Argentiña, Ghigermo, Tiritoffolo, Zanettin
(col suo abito da villano.)
Zan. Sciô Patron, de là in sala gh’è uña zoena forestiera, chi ve çerca.
Ghig. Uña forestea, e zovena! cos’ala da fâ con mì.
Zan. A m’hà dito ch’a v’hà da parlâ d’un affare de premura.
Ghig. Digghe ch’a vegne. Sentirò cos’a vœu.
Zan. (guardando Tiritoffolo ride). Ah, ah, ah.
Tirit. (si volta verso Zan.) A quello che veddo quest’ommo me mette a i rixi!
Zan. Oh che figura! Ah, ah, ah. (ride)
Ghig. Taxi lì, pezzo d’aze. O l'è mæ zennero.
Zan. Ah, ah, ah; cose ve ne pâ, sciâ Argentiña?
Arg. Ti no vœu taxeì? ti fæ sempre o buffon tì!
Zan. Ma quæsto lì l’è o mario, ch’ei comisso da lontan paieize pe ostra figlia a sciâ Ottaietta?
Ghig. Scì, scì, o mæximo. Te n’occore qualchosa?
Zan. (risoluto) Pre bacco a l'è ben mencioña, s’a no se n’hà çernuo un mieglio de quæsto. (fuggendo via)
Ghig. Argentiña, me pâ che Zanettin, per a troppa confidenza che se ghe dà, o se pigge da libertæ, e ch’o se faççe insolente, e s’o tira avanti coscì o manderò via, con qualche fracco de bastonæ per zointa.
Tirit. (guardando Zanettino mentre che se ne và) E me ven sospetto, caro sciô sœuxoro, che quello vostro manente lì (fœura d’êsse guerço) o sæ quello Ghigærmo de poco fà che v’ho dito. E s’hò da divero sccetto, o me pâ lê de seguro.
Ghig. Ah, per ninte, v’assunæ. Non se pœu dâ questa cosa. Questo o l’è un mæ ommo de caza, manente, giardinæ,[sic] facendê, che a dira sccetta ghe vœuggio ben, e o m’accomoda in tante cose. o l’è un poco allegro e buffon, ma poi o non hà vizii cattivi.