De Franchi Comeddie 1781/Ra locandera de Sampê d'Areña/17
| ←Scena XVI | Ra locandera de Sampê d'Areña de Scena XVII |
Scena XVIII→ |
| a m co-a tirde a l'é stæta reiza co-a doggia m (mm) |
Ghigermo, Tiritoffolo.
Tirit. (affannato) Agiutto, agiutto! ahime mì! che assascinamento! che canaggia!
Ghig. Cos’è stà cosa? chi v’hà dæto fastidio? parlæ, chi seivo?
Tirit. Son un galant’ommo, e di primi borgheixi de Borzonasca.
Ghig. De Borzonasca?
Tirit. Sì signor, e per purgâ i mæ pecchæ son vegnuo a Zena per piggiâ moggê, e spozâ a figgia d’un çerto sciô Ghigærmo Bambara de Sampê d'Areña, che o l'è o ciù peçço de birbante, che...
Ghig. Oe oe, sciô Borzonasca, guardæ comme parlæ!
Tirit. Credeime quello che ve diggo, che l'è uña veritæ. E de ciù o l'hà uña pelendoña de figgia, rebelea, impertinente, e sfacciadda comme uña sbira, che non se pœu fâ de ciù.
Ghig. Seì matto, sciô Borzonasca?
Tirit. Ve diggo de scì; e gh’è un çerto sò coxin ofiçiale, che o l’è a scciumma di imbriagoin, un fumadô da tabacco, e o l’amaçça doî ommi per settemaña. Ahime mì! o m’hà fæto trovâ tanta scagaboggia, che me dœue a pança de spavento. Ghig. Se ve bogge a pança stæ lontan da mì; ma v’aregordo de parlâ in atra manera de persoñe de questa qualitæ, altrimente ve farò parlâ comme và.
Tirit. Se ve diggo boxia vorræ êsse despeççaò comme a toniña. se conoscessi quella sorte de gente, diresci quello che diggo mì.
Ghig. E non saveì, sciô Borzonasca galante, che mì che ve parlo son quello Ghigærmo Bambara, dro quæ andæ façendo un retræto coscì brutto.
Tirit. Oh per ninte affæto, non è possibile. se l'hò lasciaò in questo momento chì da basso in compagnia d’un ofiçiale, e de doî o treì atri pelendoin sò cameadde.
Ghig. (a parte) Ah, ah, o l'è matto, se ghe gira o çervello.
Tirit. Guardæ se l'è comme ve diggo. O sciô Ghigærmo o l'è guærço d'un oeuggio, e rango da gamba senestra. s’o l’era chì un poco fa ve diggo.
Ghig. (a parte) Chì gh’è quarcosa sotto, che non arrivo a capî.
Tirit. E sò figgia a l’hà uña brutta faccia, storta, desgœugnâ, zemba, piña de tutti i defætti.
Ghig. Questo è quarche zughetto. (a parte)
Tirit. Voî all’aria seì un ommo come se dæ, e ve prego a defendeme, e tegnime sotto a vostra proteçion contro questa canaggia.
Ghig. Bezœugna che rie... Non ve dubitæ de ninte, che piggierò e vostre defeize. A sarà assolutamente uña burla, che v’averan fæto.
Tirit. Ghe[sic] ben da gente cattiva in sto Paize.
Ghig. Dî benissimo, e ve replico, che mì son quello mæximo Ghigærmo, che andavi coscì strapassando.
Tirit. E mì son quello Tiritoffolo figgio do sciô Giangorgolo, che vegno in çerca da vostra persoña.
Ghig. Saccæ che mæ figgia a l'è de boña grazia. A non è storta, nè zemba, nè defettosa.
Tirit. Comme l’è coscì, mi son vostro Zenero, e ve presento uña lettera do Pappà.
Ghig. Conoscio a sò firma. (si mette gli occhiali) Scì, questa è sò man. (legge) e mì son chi per abraççave come tale, e comme figgio d’un mæ caro amigo.