De Franchi Comeddie 1781/Ra locandera de Sampê d'Areña/1
| ←Personaggi | Ra locandera de Sampê d'Areña de Scena I |
Scena II→ |
| a m co-a tirde a l'é stæta reiza co-a doggia m (mm) |
Argentiña, Ghiggiermo.
Arg. Caro sciô Ghiggiermo, me fæ torto con questi vostri dubii. Questa non è a primma votta, che v’agge dæto contrasegni da stimma, e dell'attaccamento che hò per a vostra persoña.
Ghig. Eì raxon, cara Argentiña. Ma voî, che sei uña zovena chi pensa ben, doveresci compatime, se diggo, che un povero, vidovo, zà attempaò comme son, dovendose remariâ con uña zovenotta da vostra etæ, a quæ poreiva rende feliçe un di ciù belli zerbinotti de Zena; çerco de scandagiave un poco in o cœu, primma de ligase con quella cadeña, chi poreiva rendeve infeliçe.
Arg. Ve ringrazio infinitamente da boña opinion, che aveì de mì; ma in quanto a compative, sciù questo, scuzæme, che non o devo fâ. Se gh’è diferenza d’ætæ, a ven compençâ da quelli ben, da quelle ottime qualitæ, che largamente possedeì ciù de mì, e da quello carattere da galant'ommo, e ommo come se dæ che seì. Se voî seì vidovo, o son mì ascì, Hò provaò abastan- za a zoventù, con o me primmo mario me basta coscì. Donque non vœuggio ciù sentî parlâ de dubietæ.
Ghig. Donque, se seì contenta voî, non ne parlemmo ciù. Se avereì poco piaxeì d’esseve unia con mì ve poreì lamentâ de voî mexima. E per fave veì che staggo in proposito, parto in questo momento per andâ a Zena, a dâ e disposizion necessarie per ultimâ o nostro matrimonio, che vœuggio finî in compagnia de quello d’Ottavietta mæ figgia.
Arg. Bravo, sciô Ghiggiermo. Andæ presto, sbrighæve ciù che sæ possibile, che fra tanto mi vaggo a ultimâ, comme zà semmo d’accordio, i conti con quella persoña a ra quæ penso de renonçiâ a mæ Locanda. (parte)
Ghig. Addio a mæ cara Argentiña.